अरबय् नेपाःमित ज्वनेगु अझ अप्वल
येँ (सन्ध्या टाइम्स)/संयुक्त अरब इमिरेट्सय् वंगु दछिया दुने नेपाःमित ज्वनेगु क्रम अझ तच्वया वनेवं अन च्वंगु नेपाली राजदूतावासं छगू अपील जारी यासें नेपाःमितय्त सचेत याकूगु दु ।
वंगु असोज २८ गते राजदूतावासं जारी याःगु उगु विज्ञप्तिइ आपालं नेपाःमित अनया कानून मथुयाः नं ज्वंकाच्वने माःगु खँ धयातःगु दु ।
विज्ञप्तिइ अनया कानून बारे सतर्क जुइमाः धासें थीथी कथंया प्रतिबन्धित सामान ज्वना मवनेत नं इनाप याःगु दु।
अनया कानून कथं प्रतिबन्धित गजि, चरेस, थ्वँ, अय्लाः, नग्न वा अर्धनग्न मनूतय् तस्वीर, सफू लगायतया सामान ज्वनाः यात्रा मयायेत विज्ञप्तिइ इनाप यानातःगु दु।
थज्याःगु सामान ज्वनावःगुलिं अन आपालं नेपाःमित जेलय् लानाच्वंगु खँ नं दूतावासं जारी याःगु प्रेस विज्ञप्तिइ न्ह्यथनातःगु दु ।
