नेपालय् वित्तीय संकटया लिच्वः आः तक छगूत्या अर्ब द्यापं
विश्वन्यंकं वःगु आर्थिक मन्दीया लिच्वः नेपालय् उलि लाइ मखु धाःसां नं उकिया हे लिच्वः स्वरुप आः तक थीथी उद्योग चले याइपिं नेपाःमि उद्योगपतितय्सं छगूत्या अर्ब तका द्यापं फयेधुंकूगु खँ सीदुगु दु । नेपाल राष्ट्र बैंकया कामु गभर्नर कृष्णबहादुर मानन्धरं थुकिया जानकारी बियादीगु खः ।
विश्व आर्थिक मन्दीया लिच्वः खास यानाः नेपाःया प्लास्टिक, स्टिल व नयेचिकंया व्यापारीतय्त लाःगु दु । थ्व ख्यःया व्यापारीतय्सं तःधंगु द्यापं फयेमाःगु कारणं उमिसं त्यासा कयातःगु बैंकत तकं प्रभावित जुयाच्वंगु खँ नं सूत्रं धाःगु दु । कामु गभर्नर मानन्धरया कथं बैंकतय्त थज्याःगु समस्या वःगु कारणं न्हापा ९० न्हुं पुलेमाःगु त्यासा आः १८० न्हुं जक पूसां गाःगु व्यवस्था यायेधुंकूगु दु । स्टिल उद्योगय् अप्वः लगानी दुगु ग्लोबल बैंक लगायतं थ्व मन्दीया कारणं यानाः थुगुुसी फाइदा तकं नके फइगु अवस्था मदुगु खँ नं धाःगु दु । तर कामु गभर्नर मानन्धरं धाःसा बैंकिंग ख्यलय् अझ नं खास हे समस्या मवःनिगु खँ धयादीगु दु । उखे आर्थिक मन्दीया कारणं खाडी देशय् ज्यामित क्वपालेगु क्रम शुरु जुइधुंकूसां उकिया लिच्वः धाःसा नेपाःयात आः तक मलाःनिगु खँ नं धाःगु दु । ज्यामित क्वपालेगु शुरु जुइवं नेपाः दुहां वइगु रेमिटेन्स म्हो जुइगु अनुमान थन जुयाच्वंगु खः । तर राष्ट्र बैंकया तथ्यांकं धाःसा अझ नं रेमिटेन्स म्हो जूगु मक्यंनि । तर विश्वव्यापी संकटं सशंकित जुयाच्वंपिं व्यापारीतय्सं धाःसा थ्व वित्तीय संकटं नेपाःयात बुलुहुँ लिच्वः लाकीगु बिचाः प्वंकूगु दु । सम्बद्ध व्यापारीतय् धापू कथं थ्व विश्व वित्तीय संकटया लिच्वः नेपालय् आः मलाःसां मेगु निला प्यला लिपा बुलुहुँ खने दया वइ । आर्थिक संकटया कारणं खाडी लागाय् नेपाःमितय्त ज्या थपे यायेगु म्हो जुयाच्वंगु व थप ज्या मबिउगु कारणं नेपाःयात वनीगु रेमिटेन्स म्हो जुइगु अनुमान जूगु खः । तर नेपालं खाडी लागाय् ज्या याः वनीपिं नेपाःमितय् ल्याः धाःसा अझ नं खास हे म्हो मजूगु खँ धाःगु दु ।
संकटया कारणं जःलाखःला देय् चीन व भारतय् नं आर्थिक वृद्धिदर म्हो जुइगु अनुमान विज्ञतय्सं यानाच्वंगु दु । न्यूयोर्क जुयाः भारतया दिल्ली व चीनया बेइजिङ्ग तकं थ्यंकः वःगु वित्तीय संकटया गम्भीर लिच्वःपाखें बचे जुइत सरकारं निरन्तर सजगता नालेमाःगु सुझाव नं विज्ञतय्सं बियाच्वंगु दु । वित्तीय संकट बारे नेपाःया संविधान सभाय् नं उकुन्हु सहलह जूगु खः ।
