राष्ट्रपतिं गल्ती स्वीकार याःसा सहमति: डा. बाबुराम
येँ (सन्ध्या टाइम्स)/ प्रधानसेनापतिया थमौती यायेगु बारे राष्ट्रपतिं गल्ती स्वीकार यात धाःसा राजनीतिक सहमति कायम जुइगु खँ माओवादी उपाध्यक्ष डा. बाबुराम भट्टराईनं धयादीगु दु ।
थौं सुथय् थःगु छेँय् देउसी भैलो म्हितः वःपिं पत्रकारतलिसे खँ ल्हासें वय्कलं उगु खँ धयादीगु खः ।
नागरिक सर्वोच्चता कायम यायेगु निंतिं थःपिंसं आन्दोलन यानाच्वनागु खँ न्ह्यथँसें डा. भट्टराईनं थःपिं फयांफछि लचक जुयागु खँ नं धयादीगु दु ।
माओवादीया नेतृत्वय् सरकार गठन जूगु स्वयेत जनता आय्बुयाच्वंगु खँ कनादिसें वय्कलं याकनं हे माओवादीया नेतृत्वय् सरकार गठन जुइगु खँ धयादीगु दु ।
उखे नेपाली कांग्रेसया उपसभापति सुशील कोइरालां धाःसा समस्या समाधान यायेगु निंतिं माओवादी पंगः जुयाच्वंगु खँ धयादीगु दु ।
नेपाली कांग्रेसया सभापति गिरिजाप्रसाद कोइरालाया छेँय् देउसी भैलो म्हितः वःपिं पत्रकारतलिसे खँ ल्हायेगु झ्वलय् वय्कलं उगु खँ धयादीगु खः ।
वय्कलं प्रधानसेनापति प्रकरणय् राष्ट्रपतिं ल्ह्वंगु पलाः बारे गुगुं नं कथंया खँ मजुइ धासें राष्ट्रपतिं देय् बचे यायेत ल्ह्वंगु पलाः पाय्छि जूगु बिचाः नं प्वंकादीगु दु ।
