छवाःया कालबिलं नेप्से थहां वन
येँ (सन्ध्या टाइम्स)/थ्व वालय् नेपाल स्टक एक्सचेन्जय् जूगु शेयर कालबिलं नेप्से १० दशमलव २२ अंकं थहां वंगु दु। वंगु वालय् नेप्से कुहां वयाः ६ सय अंकं नं कुहां वःगु खःसा कालबिलया अन्तय् नेप्से १० अंकं च्वय् थहां वनेवं छवाः नेप्से नं थहां वंगु खः। थ्व वालय् ५९९ दशमलव ३३ अंकं न्ह्याःगु शेयर कालबिल वाः लिपांगु न्हि ६०९ दशमलव ५५ अंकय् थ्यंकाः बजाः बन्द जूगु खः ।
थ्व वालय् नेप्सेय् ग्वीस्वंगू कम्पनीया ३८७४ कालबिलं स्वीन्हय्गू करोड छगू लाख व स्वछद्वः तका दांया झिंन्यागू लाख चय्गुद्वः व स्वसः कित्ता शेयर न्याये-मी जुल। थ्व स्वयां न्ह्यः वंगु वालय् ४१४१ गू कालबिलं नीच्यागू करोड न्हय्गू लाख स्वीनिद्वः तका दां बराबरया न्यागू लाख पीनिद्वः व न्हय्सः कित्ता शेयर न्याये-मी जूगु खः ।
थ्व ल्याखं वंगु वालय् स्वयां थुगु वालय् जूगु दांया कालबिल ३१ दशमलव ४८ प्रतिशतं थहां वंगु दु ।
नेप्सेय् जूगु मुक्कं कालबिल मध्ये 'क' वर्गया कालबिल धलः सेन्सेटिभ इन्डेक्स नं थ्व वालय् २ दशमलव १५ अंकं थहां वंगु दु। वाःया न्हापांगु न्हि १५१ दशमलव ५२ अंकं शुरु जूगु सेन्सेटिभया कालबिल लिपाःगु न्हि १५३ दशमलव ६७ अंकय् थ्यंकाः बजाः बन्द जुल ।
थ्व वालय् 'क' वर्गया कम्पनीं जक झिंखुगू करोड ख्वीछगू लाख दांया कालबिल याःगु दु। थ्व नेप्सेय् जूगु मुक्कं कालबिलया ४४ दशमलव ८९ प्रतिशत खः ।
थ्व वालय् दकलय् अप्वः झिगू करोड दां व झिंछगू लाख न्हय्न्याद्वः तका दांया कालबिल याःगु लिधंसाय् नेशनल हाइड्रो पावर कम्पनी व दकलय् अप्वः स्वसः व न्हय्स्वंगू कालबिल याःगु लिधंसाय् पशुपति डेभलपमेण्ट बैंक न्ह्यःने लाःगु दु ।
