राष्ट्रपति यादवं कांग्रेस नेता भट्टराईयात नापलात

राष्ट्रपति डा. रामवरण यादवं पुलांम्ह प्रधानमन्त्री नापं कांग्रेसया संस्थापक नेता कृष्णप्रसाद भट्टराईयात नापलानादीगु दु ।

गोदावरीइ च्वंगु नेता भट्टराईया छेँय् वनाः राष्ट्रपति यादवं आइतवा: वयेकया स्वास्थ्य अवस्थाया बारे जानकारी कयादीगु खः । अथेहे राष्ट्रपति यादवं नेता भट्टराईयात स्वन्तिया भिंतुना नं बियादीगु खँ राष्ट्रपतिया ज्याकूथी धाःगु दु ।

भट्टारई नापलायेधुंकाः संचारकर्मीत नाप खँल्हाबंला यानादिसें राष्ट्रपति यादवं अन्तरिम संविधान व बृहत शान्ति सम्झौताया भावना कथं न्ह्याः वनेमाः धयादिल । वयेकलं झी गु लँपू जुया थन तक थ्यंगु खः वहे लँपूइ न्ह्याः वनेमाःगु बिचाः प्वंकादिल ।

वयेकलं आम नेपाली जनतयात सुख शान्तिया साथ म्वाये दइगु वातावरण निर्माण यायेत दक्वं पक्ष जिम्मेवार जुइमाःगु नं धयादिल ।