जानकी एफएमलय् मि न:या आपलं क्षति, थाय् थासय् मि न:ल
जनकपुरया जानकी एफएमय् आइतवाः सुथय् मि न:या अपालं क्षति जूगु दु । विजुलीया तार सर्ट जुया च्याःगु मिया कारणं अन नीगू लख स्वयां अप्वया सामान क्षति जूगु दु । मि न:या अनया दक्वं रेडियो उपकरणत च्यानाः ध्वस्त जूगु दु ।
अथेहे सप्तरीया भगनी मलेठ गाविस-२ लय् वंगु चान्हय् मि न:या छम्ह मचा सीगु दुसाः छखाः हे छेँया स्वम्ह घाःपाः जूगु दु । स्वन्ति नखःया लसताय् च्याकातःगु पल्चाः पाखें स्थानीय सिठकुन मेहताया छेँय् मि च्याःगु खः । मि च्यनाः मेहताया झिदँया म्हाय् ममता सीगू खसाः वयेकया जहान शान्तिदेवी, काय् मिथलेस व म्हाय् बब्ली घाःपाः जूगु खः । घाःपाः जूपिंत बीपी कोइराला विज्ञान प्रतिष्ठानय् धरानय् वासः याकातःगु दु ।
अथेहे मैनमतया कारणं सिन्धुपाल्चोकया लिपनिबजारय् मि न:या कारणं लखौं तकया क्षति जूगु दु । स्थानीय कान्छा लामाया छेँ नं च्याःगु मिनं याना नापसं च्वंगु खुखाः छेँ नं नष्ट जूगु दु । मि च्याना हरिबहादुर श्रेष्ठ, कामी लामा, लिला लामा, रेशम गुरुङ व काले गुरुङया छेँय् मि नःगु खः ।
प्रहरीया कथं करीब छगू करोड तका बराबरया धनमाल क्षति जूगु दु । अन शुक्रवाः बहनी न्हय्तात्याः ईलय् मि नःगु खः ।
