नेवाः लागा बारे हेटौंडाय् सहलह
नेपालभाषा खलः हेटौंडा, नेवाः सांस्कृतिक पुचः हेटौंडा, सानुपोखरी चौकी नेवाः पुचःया व नेवाः ग्वाहालि पुचःयासंलग्नताय् हेटौंडा नेपालभाषा खलःया ज्याकुथी म्हीग छगू मंकाः ज्याझवः जुल । ज्याझवलय् मूपाहां नेवाः देय् दबूया नायः भाजु मल्ल के. सुन्दरं नेपालमण्डल लागाया बारे ध्वाथुइकेगुया लिसें थीथी राजनीतिक पार्टी दुने दुगु नेवाः भातृसंगठनत लिसें सहलह यानाः राज्य पुनर्संरचना बारे मंकाः अवधारण व मंकाः संरचना दयेका न्ह्याःवनेगु निंतिं जुयाच्वंगु गतिविधि बारे कनादीगु खः । नेपालभाषा खलः हेटौंडाया नायः महारत्न बज्राचार्यया सभापतित्वय् जूगु उगु ज्याझवलय् नेवाः देय् दबूया पूर्वाञ्चल न्वकु नरेश ताम्रकारं नेवाः देय् दबूया न्याक्वःगु अधिवेशनया बारे ध्वाथुइकादीगु खः ।
ज्याझवलय् मकवानपुर उद्योग वाणिज्य संघया पुलांम्ह नायः दिपक श्रेष्ठं हेटौंडा बजाःया मू दुवातय् धस्वाकातःगु मदुम्ह जुजु महेन्द्रया झवाता लिकायेधुंकाः आः अन राष्ट्रिय विभूति शंखधर साख्वाःया झवाता तयेगु निंतिं जुयाच्वंगु ज्याया प्रगति विवरण न्यंकादीगु खः ।
क्रान्तिकारीतय्सं अन च्वंगु पूर्ण कदया महेन्द्रया झवाता थनिं दत्या न्ह्यः ध्वस्त याना बिउगु खः । आः अन शंखधरया झवाता तयेगु निंतिं राजनीतिक पहल शुरु जूगु दु ।
ज्याझवलय् नेवाः देय् दबूया मध्यपश्चिमाञ्चल न्वकु दीपक शाक्य, केन्द्रीय दुजः सुदर्शना दर्शनधारी व नेवाः संचार संजालया दुजः अनुप सिंह सुवालपिंसं नं ब्वति काःगु खः ।
