प्रधानमन्त्री पाखें मुक्तिनाथया दर्शन
प्रधानमन्त्री माधवकुमार नेपालं शनिवाः मुक्तिनाथया दर्शन यानादीगु दु । नेकपा (एमाले)या नेता अमृत बोहरा, प्रदीप नेपाल व रघुजी पन्त नापं नेपाली सेनाया हेलिकप्टरय् च्वनाः प्रधानमन्त्री उखे पाखे झायादीगु खः ।
मुक्तिनाथया दर्शन याये न्ह्यः प्रधानमन्त्रीं मुस्ताङय् दुगु अन्नपूर्ण संरक्षण क्षेत्र एक्याम्पया गतिविधिया विषयलय् निरिक्षण यानादीगु खः । प्रधानमन्त्रीया पुचलय् वनमन्त्री दीपक बोहरां नं अन्नपूर्ण संरक्षण क्षेत्रया भ्रमण यानादीगु खः ।
मुस्ताङया लोमान्थाङय् स्थानीय जनता नाप प्रधानमन्त्री नेपालं अर्न्तक्रिया यानादीगु खः । उगु ईलय् प्रधानमन्त्रीयात स्थानीय जनतां कोर्ला नाका च्यायेकेमाःगु, लँ निर्माण यायेगु, सिमाः पीमाःगु, धमी खुसीइ जलविद्युत संचालन नापं नरिसं गुम्वाया मर्मतसंहार लगायत परियोजनाया माग याःगु खः । अथेहे अनया जनतां प्रधानमन्त्रीयात स्वीगू स्वयां अप्व ज्ञापनपौ व मागपौ लःल्हाःगु खः ।
प्रधानमन्त्रीं दक्व माग पौ ब्वनेधुंकाः जायज मागत सम्बोधन यायेत सरकारं ध्यान केन्द्रीत यायेगु धयादिल । प्रधानमन्त्रीं मुस्ताङया पुलांम्ह जुजु जिग्मे सिंग्ने पलवर विष्ट नाप नापलानाः वयेकया स्वास्थ्या स्थितिया बारे जानकारी नं कयादीगु खः ।
