सहमति मजूसाः संवैधानि व राष्ट्रिय संकट : खनाल
नेकपा (एमाले)या अध्यक्ष झलनाथ खनालं राजनीतिक दलत आः नं एकताबद्ध जुयाः सहमति मयासाः देय् संवैधानिक व राष्ट्रिय संकटय् लाइगु ख्याच्वः बियादीगु दु ।
एमाले ख्वपः जिल्लां नेपाल संवत् ११३० न्हूदँया लसताय् शनिवा: ग्वसाःग्वःगु भिंतुना कालबिला यायेगु ज्याझ्वलय् न्ववानादिसें वयेकलं दलत मिलेजुया वनेगुया विकल्प मदु धयादिल । वयेकलं न्हूगु संविधान निर्माण मजूसाः देश दुर्घटनाय् लाइगु धयादिसें दलत दथुइ दुगु असमझदारी चीकेमाःगु बिचाः प्वंकादिल ।
सत्ता दुने व पिने च्वंपिं दलत दथुइया ध्रुवीकरण, कटुता व अन्तर संघर्ष अप्वयावंगुलिं थुकीं संविधान निर्माणयात छखे लाकूगु खँ एमाले अध्यक्ष खनालं धयादिल । वयेकलं समस्या समाधान यायेत व लोकतान्त्रिक जनआन्दोलनं प्राप्त उपलब्धियात संस्थागत यायेत एकता व सहमति आवश्यक जूगु धयादिल ।
वयेकलं देय्या न्ह्यने न्यागू महत्वपूर्ण कार्यभार दुगु धयादिसें उकीयात पूवंकेत दक्वं छप्पँ जुयाः वनेमाः धयादिल । शान्ति प्रकृयायात निष्कर्षय् थ्यंकेगु, न्हूगु संविधान निर्माण यायेगु, देय्यात संघियताय् यंकेगु, आर्थिक क्रान्ति यायेगु, राष्ट्रिय एकता निर्माण यायेगु जिम्मेवारी दक्वं दलतय् जूगुलिं नं एकता आवश्यक जूगु वयेकलं धयादिल ।
