थुगुसी जुइगु मोटरसाइकल र्यालीत
मंकाः खलःया आधिकारिक मोटरसाइकल र्याली बौद्धय्
येँ (सन्ध्या टाइम्स)/नेपालभाषा मंकाः खलकं न्ह्याका वयाच्वंगु न्हूदँ मोटरसाइकल र्याली थुगुसी खास्ती नेवाः पुचलं न्ह्याकीगु जूगु दु। थ्वहे वइगु कछलाथ्व पारु सोमवाः कुन्हु सुथय् ९ बजे बौद्ध गेटं उगु र्याली न्ह्याकीगु खँ नेपालभाषा मंकाः खलकं धाःगु दु ।
थुगु र्यालीं येँ, यल व ख्वपया थीथी लागा चाःहिलीगु ज्याझ्वः दु। नेपालभाषा मंकाः खलःया ग्वसालय् दँय्दसं थुकथं मोटरसाइकल र्याली याना वयाच्वंगु दु ।
मेखे उकुन्हु हे येँया मरुत्वालं गंगा क्लबपाखें नं छगू मोटरसाइकल र्याली पिकाइगु ज्याझ्वः दु। उगु र्याली नं स्वनिगःया थीथी लागा चाःहिलीगु ग्वसाः दु ।
उखे थ्वहे वइगु कछलाथ्व पञ्चमि (कार्तिक ६ गते) शुक्रवाः कुन्हु चःमति नेवाः खलःपाखें येँ-त्रिशुली-येँ मोटरसाइकल र्याली याइगु जूगु दु। शुक्रवाः येँनं वनीगु उगु र्याली त्रिशुलीइ सांस्कृतिक ज्याझ्वः, मैनमत र्याली व नेवाः भ्वय् यासें शनिवाः येँय् लिहां वइ ।
अथे हे न्हूदँया लसताय् कछलाथ्व पञ्चमि कुन्हु हे नेवाः भोलिन्टियर्सया ग्वसालय् येँनं गोरखाया मनकामना तक नं छगू मोटरसाइकल र्याली याइगु ग्वसाः दु। शुक्रवाः वनीगु उगु र्याली नं अन छगू ज्याझ्वः यासें शनिवाः येँय् लिहां वइ।
उकथं हे कछलाथ्व १२ (कार्तिक १३ गते) कुन्हु येँनं बाग्लुङ्ग तक नं छगू मोटरसाइकल र्याली याइगु ग्वसाः दु ।
मरुत्वाःया सिन्हःस्वां खलःया ग्वसालय् उगु र्याली वनीगु खः। कछलाथ्व १२ कुन्हु येँनं प्रस्थान जुयाः बाग्लुङ्गय् छगू ज्याझ्वः यानाःलि कछलाथ्व १३ कुन्हु र्याली येँय् लिहां वइगु ग्वसाः दु ।
उखे नेवाः राष्ट्रिय मुक्ति मोर्चा नेपाःपाखें नेवाः राज्यया सीमा लागा चाःहिलेगु कथं छगू मोटरसाइकल र्यालीया ग्वसाः ग्वःगु दु। थ्वहे वइगु कछलाथ्व षष्टि (कार्तिक ७ गते) शनिवाः कुन्हु येँनं शुरु जुयाः नेवाः लागाया सीमा चाःहिलाः टिष्टुङ्गय् क्वचाइगु क्वचाइगु ज्याझ्वः दु ।
