यलय् निन्हुया दुने प्यंगू एल्बम विमोचन
यल(सन्ध्या टाइम्स)/ नेपाल संवत् ११३० न्हूदँया लसताय् सायम अडियो भिडियोया देछा कथं 'मतिनाया लँय्' म्युजिक भिडियो व म्येँच्वमि काजीराज शाक्यया न्हूगु सीडी 'न्हूम्ह पासा' थौं पित ब्वज्या जुल ।
बाखं च्वमि यज्ञरत्न धाख्वाःया सभापतित्वय् जूगु ज्याझ्वलय् भि.सि.डी व म्येँचाःया पितब्वज्या मूपाहां संस्कृतिविद् सत्यमोहन जोशीं यानादीगु खः ।
म्येँ च्वमि काजीराज शाक्यं लसकुस यानादीगु उगु ज्याझ्वः मूपाहां जोशीं त्वाःदेवा च्याकाः उलेज्या यानादीगु खः। उगु ज्याझ्वलय् फ्रान्सेली निर्देशक भेरा सन्दपं नं न्ववानादीगु खः ।
ज्याझ्वलय् भि.सि.डीया छाँयाकार शंकर महर्जनं सुभाय् देछानादीगु खःसा म्यूजिक भिडियोया कलाकार, निर्देशक व ग्वाहालिमिपिंत लुमन्ति चिं नं लःल्हाःगु खः ।
अथे हे म्हिगः यलया ज्यापु समाजया ज्याकुथी जूगु छगू ज्याझ्वःया दथुइ डेल्टा मल्टिमेडिया प्रोडक्सनपाखें पिथंगु 'सर्गः मिला' संकिपाया भीसीडी व 'हिसिं जाःगु पहः' म्युजिक भिडियो विमोचनजुल ।
ज्यापु समाजया नायः रामकाजीं अवालें उगु विमोचन यानादीगु खः। डेल्टाया प्रोपाइटर भाइकाजी महर्जनया सभापतित्वय् जूगु उगु ज्याझ्वलय् विजयरत्न असंबरे व अमरराज शर्मापिंसं विमोचित सीडीया बारे समीक्षा यानादीगु खः ।
