कांग्रेस नेतात लुत्रुक्क

येँ (सन्ध्या टाइम्स)/सुजाता कोइरालायात उपप्रधानमन्त्री दयेकूगु खँय् कांग्रेसया केन्द्रीय नेतातय्सं विरोध याःसां केन्द्रीय बैठक क्वचायेवं हे उकिया नेता धाःसा लुत्रुक्क च्वनेधुंकूगु दु। म्हीग च्वंगु केन्द्रीय बैठकं थ्व प्रकरणय् पार्टी सभापति गिरिजाप्रसाद कोइरालायात हे बैठकय् उपस्थित याकाः स्पष्टीकरण कायेगु धकाः निर्णय याःगु खःसां म्हिगः बीबीसी नेपाली सेवालिसे खँल्हाबल्हा यानादीम्ह उपसभापति रामचन्द्र पौडेलया सः धाःसा लुत्रुक्क च्वनेधुंकूगु दु। वय्कलं कोइरालायात केन्द्रीय बैठकय् उपस्थित याकेगु धकाः निर्णय जूगु खःसां व स्पष्टीकरण कायेगु वा कारवाही यायेगु धइगु ल्याखं जूगु मखु धयादिल। थ्व बारे छु यायेगु धइगु खँ आः पार्टीया थःगु हे पद्धति कथं न्ह्याः वनीगु खँ नं कनादिल।
सुजाता कोइराला प्रधानमन्त्री माधव नेपाललिसे भारत मवंगु खँय् नं नेतातय्सं बबाल यात लिपा सुजाता वयाः स्पष्टीकरण बीवं वय्कःयात छुं हे मयात, आः नं अथे हे जुइगु लाकि धकाः न्ह्यसः तःबलय् वयकलं धयादिल, 'अबलय् कम से कम उलि स्पष्टीकरण कायेगु हिम्मत ला जुल नि !'
कोइरालां थ्व प्रकरणयात 'चिचीधंगु खँ' धयादीगु दु। वय्कः म्हिगः येँय् लिथ्यने नं धुंकूगु दु ।