इहिपाय् थथे नं जुइ यः

येँ (सन्ध्या टाइम्स)/छम्ह मिजनं थः म्ह्याय् यंकल धकाः मिसाया थःछेँ खलकं मिजंया तताःजुम्हेसित अपहरण याना हःगु दु। घटना इटहरीया खः। स्थानीय दर्शन सोनीं प्यला न्ह्यः इटहरीया अनिता खड्का (१८ दँ) यात बिसिकाः ब्याहाः याःगु जुयाच्वन। उकिया तमं अनिताया थःछेँ खलकं दर्शनया तताःजुयात अपहरण यानाः थःथाय् कुने हल। मिसा पक्षं थः म्ह्याय् लित मबिउतले तताःजुम्ह लित मबीगु ख्याच्वः बिउगु दु। उखे म्ह्याय् बिसिकूम्ह दर्शन सोनीं थःगु ज्यान खतराय् लात धकाः प्रहरीइ उजुरी बिउसां प्रहरीं वास्ता मयाःगु द्वपं बिउगु दु। प्रहरीं धाःसा मिजनं म्ह्याय् नाप तकं मलाकूगुलिं समस्या जूगु खँ धाःगु दु ।