नेपाली सिबें नं भारतीय गाडी अप्वः
येँ (सन्ध्या टाइम्स)/न्यनेबलय् अजूचायापुगु खँ। तराई लागाय् लाःगु धनुषा जिल्लाय् दर्ता जुयाच्वंगु नेपाली नम्बर प्लेटया गाडी ७०० ति जक दु। तर अन थ्व स्वयां नं अप्वः धाःसा भारतीय नम्बर प्लेटया गाडी चले जुयाच्वंगु दु। व नं भारतय् खुयाः नेपालय् भन्सार मपुसे हयातःगु गाडीत। थज्याःगु गाडीत भारतीय लागाय् वये वने यायेत अःपुइगु व भन्सार नं पुले म्वाःलीगु जुयाः अन थुकिया चलन अप्वया वःगु खः ।
थज्याःगु गाडीत अप्वः यानाः थीथी राजनीतिक पार्टीया ध्वाँय् छपु छपु तियाः ब्वाकाच्वंगु दइ। अय् जुयाः प्रहरीं नं उकियात काचाक्क थी ग्याः। गुलिखे स्थानीय क्लबतय्सं ला भारतीय नम्बर प्लेट दुगु एम्बुलेन्स तकं सतकय् ब्वाकाच्वंगु नं लूगु दु ।
थज्याःगु हे गाडी छ्यलाः अपराधया ज्या नं अप्वयेफुगु आशंका प्रहरीं याःगु दु ।
