हाकुगु ध्वाँय् क्यनेगु झ्वलय् ल्वापु
येँ (सन्ध्या टाइम्स)/ रौतहटय् स्वन्तिया लसताय् जूगु कौला ज्याझ्वलय् ब्वति कायेत वंम्ह प्रधानमन्त्री माधव नेपालयात हाकुगु ध्वाँय् क्यनेगु झ्वलय् प्रहरी व माओवादी कार्यकर्तातय् दथुइ ल्वापु जुयाः छुं प्रहरी घाःपाः जूगु दुसा छुं माओवादी कार्यकर्तातय्त प्रहरीं नियन्त्रणय् काःगु दु। ल्वापुइ सशस्त्र प्रहरी निरीक्षक चंगाबहादुर लामा घाःपाः जूगु दु।
माओवादी कार्यकर्तातय्सं प्रदर्शन याये फइगु आशंकाय् अन सुरक्षा व्यवस्था कडा यानातःगु दु ।
प्रम नेपाल रौतहटय् च्वनाजःछि थीथी ज्याकुथीया प्रमुखतय्त निर्देशन बीगु ज्याझ्वः दु ।
अथे हे वय्कलं थौं रौतहटया खुगुलिं निर्वाचन क्षेत्रया नेतातय्त नापलानादी। लिसें अन एमालेया स्थानीय नेतातय्सं रौतहटय् जुयाच्वंगु विकास निर्माण, आपराधिक क्रियाकलापया बारे प्रधानमन्त्री नेपालयात जानकारी याकादी। वय्कः थौं हे येँय् लिहां झाइगु ज्याझ्वः दु। येँय् लिहां झायेवं वय्कलं गैरआवासीय नेपाःमितय् निंतिं ग्वसाः ग्वःगु तुच्चा ज्याझ्वलय् ब्वति कयादी ।
