शान्ति सम्झौता संशोधन यायेमाःगु ओलीया बिचाः
नेकपा (एमाले)या वरिष्ठ नेता केपी शर्मा ओलीं शान्ति सम्झौता संशोधन यायेमाःगु खँ धयादीगु दु ।
शुक्रवाः विराटनगरय् संवाददातात नाप खँल्हाबंला यानादिसें वयेकलं शान्ति सम्झौता माओवादीयात जक अपुइगु कथं जूगु धयादिसें संशोधन यायेमाःगु बिचाः प्वंकादिल । वयेकलं माओवादीं राजनीतिक मूल प्रवाहयात दिका: जनताया अधिकार कुण्ठित यायेगु कुतः यानाच्वंगु द्वपं नं बियादिल । संविधान तःक्व हे संशोधन जुइधुंकूगुलिं शान्ति सम्झौता नं संशोधन यायेफइगु बिचाः वयेकलं प्वंकादिल ।
वयेकलं स्वंगू दलत दथुइ राजनीतिक गतिरोध ज्यंकेत जुयाच्वंगु वार्ता प्रति असहमति प्वंकादिसें उगु वार्तायात नाटकया संज्ञा बियादिल । वयेकलं न्हापा राजनीतियात गति बीया तीनि सार्थक वार्ता यायेफइगु धयादिल ।
लूमंकेबहजू, थ्वस्वयां न्ह्यः रक्षामन्त्री विद्या भण्डारीं नं संसदया राज्य व्यवस्था समितिलय् नेपाली सेनाया थीथी ज्याखँत शान्ति सम्झौताया कारणं न्ह्यके थाकूगुलिं सम्झौता संशोधन यायेमाःगु बिचाः प्वंकादीगु खः ।
