'ईलय् हे संविधान निर्माण यायेत माओवादी नेतृत्वया सरकार'
एकीकृत नेकपा (माओवादी)या उपाध्यक्ष डा. बाबुराम भट्टराईं माओवादी नेतृत्वया राष्ट्रिय सरकार गठन जुसाः जक ईलय् हे संविधान निर्माण व शान्ति कायम जुइगु खँ धयादीगु दु ।
शुक्रवाः सर्लाहीया हरिऔनय् जूगु जनसभाय् न्ववानादिसें नेता भट्टराईं ईलय् हे संविधान निर्माण व शान्ति चाहेजूगु खःसा माओवादी नेतृत्वया सरकारया विकल्प मदुगु धयादिसें थ्व ख्याच्वः वर्तमान कतामरी सरकारयात बियाच्वनाःगु धयादिल ।
माओवादीं वर्तमान आन्दोलन शान्ति, संविधान, नागरिक सर्वोच्चता, माओवादी नेतृत्वया राष्ट्रिय सरकार थंज्याःगु एजेण्डायात ज्वनाः न्ह्याकूगु धयादिल । राष्ट्रपतिया असंवैधानिक पलाः भिंकाः वर्तमान सरकारं स्वन्ति लिपाः नं सत्ता मत्वतुसाः माओवादीया सशक्त आन्दोलनं सरकार व सामन्तवादया अवशेषयात समाप्त याइगु ख्याचवः बियादिल ।
जनयुद्ध, जनआनदोलन व मधेस आन्दोलनया उपलब्धिया रक्षाया निंतिं नं माओवादी सरकारया विकल्प मदुगु धयादिसें संघियताया विरोधी दलत नाप सहकार्य यानाः सरकारय् वंपिं मधेशवादी दलतय्सं जनतयात धोका ब्यूगु द्वपं बियादिल । वयेकलं माओवादीं जक वास्तविक संघियता व स्वायत्तता बीफइगु दाबी नं यानादिल ।
