स्वन्ति लिपाः राजनीतिक गतिरोध ज्यनी : प्रम
प्रधानमन्त्री माधवकुमार नेपालं स्वन्ति लिपाः राजनीतिक गतिरोध ज्यनीगु खँ धयादीगु दु ।
स्वन्ति व छठया निंतिं भिंतुना बीत शुक्रवाः गृह जिल्ल्ला रौतहट थ्यंकादिम्ह प्रधानमन्त्री नेपालं माओवादीं नं याकनं हे संसद सुचारु याये चाहे जूगुलिं सहमतिया विकल्प मदुगु धयादिल । वयेकलं स्वन्ति लिपाः सर्वदलिय सहलह यानाः सहमति पिहांवइगु दाबी यानादिल । वर्तमान सरकार न्हूगु संविधान निर्माण व संसदीय निर्वाचन मजूतले कायम हे जुइगु दाबी नं प्रधानमन्त्री नेपालं यानादिल ।
वयेकयात अन माओवादी कार्यकर्तातय्सं हाकूगु ध्वाँय् क्यंगू ईलय् माओवादी कार्यकर्ता व प्रहरी दथुइ ल्वापू जूगु खः । ल्वापूइ लानाः सशस्त्र प्रहरी निरीक्षक चङगुबहादुर लामा लगायत माओवादी कार्यकर्तात घाःपाः जूगु दु । अथेहे खुम्ह माओवादी कार्यकर्तातय्त प्रहरीं नियन्त्रणय् काःगु खँ जिल्ला प्रहरी ज्याकू रौतहटं धाःगु दु ।
