लोकतन्त्रया उपहास कथं सुजात उपप्रधानमन्त्री : यादव
मधेशी जनअधिकार फोरमया अध्यक्ष उपेन्द्र यादवं सुजाता कोइरालायात उपप्रधानमन्त्री दयेकाः जनमत व लोकतन्त्रया उपहास जूगु खँ धयादीगु दु ।
कार्यकर्ता प्रशिक्षण ज्याझ्वलय् ब्वति कायेत शुक्रवाः सुनसरी थ्यंकादिम्ह अध्यक्ष यादवं जनमत मदुपिनि ल्हातय् सत्ता वंगुलिं देश गम्भीर संकटय् लाःगु धयादिल । वयेकलं निगू निर्वाचन क्षेत्रं बूम्ह प्रधानमन्त्री, निर्वाचनय् बांमलाक बूम्ह उपप्रधानमन्त्री व जनमत मदुपिं मन्त्रीत जूगु धाइगु लोकतन्त्रया उपहास मखुसाः छु धकाः न्ह्यसः न्यनादिल ।
सुनसरीइ पत्रकारत नाप खँल्हाबंला यानादिसें वयेकलं कांग्रेस सभापति गिरिजाप्रसाद कोइरालाया म्हाय् मोह व प्रधानमन्त्री माधवकुमार नेपालया सत्तामोहया मोर्चां भ्रष्टतय्त छप्पं यानाः वर्तमान सरकार निर्माण याःगु द्वपं बियादिल । वयेकलं वर्तमान सरकार थःगु हे कारणं असफल जुइधुंकूगु धयादिसें तत्काल राष्ट्रिय सहमतिया सरकारया आवश्यक जूगु धयादिल ।
वर्तमान सरकारया लापरवाहीया कारणं ईलय् हे संविधान निर्माण मजुइगु शंका अप्वःगु द्वपं बियादिसें फोरम अध्यक्ष यादवं लुखा बन्द यानाः तानाशाही ढंगं बजेट पास याःसा उकीयात नेपाली जनातां स्वीकार मयाइगु दाबी यानादिल ।
