नेप्से थहां वंसां ६ सय अंक पार मजू
येँ (सन्ध्या टाइम्स)/नेपाल स्टक एक्सचेन्जय् जूगु शेयर कालबिलपाखें म्हिगः नं नेप्से परिसूचक थहां वंगु दु। नेप्से लगातार कुहां वयेवं थुगु वालय् ६ सय अंकं कुहां वंगु खःसा छन्ह न्ह्यःया कालबिलय् नं थहां वंगु खः। तर म्हिगः नं नेप्से थहां वंसां ६ सय अंकयात धाःसा पुले फुगु मदुनि। म्हिगःया कालबिलं नेप्से शुन्य दशमलव ७ अंकं थहां वनाः ५९९ दशमलव ५ अंकय् थ्यंगु दु। अथे हे सेन्सेटिभ शुन्य दशमलव ७१ अंकं थहां वंगु दु। छन्हु न्ह्यः कुहां वंगु फ्लोट म्हिगः धाःसा शुन्य दशमलव २३ अंकं थहां वन ।
बजाः चालेवं नेप्से कुहां वंगु खःसा वयां बाघौ लिपा नेप्से मदिक थहां वन। थुकथं थहां वंगु परिसुचक थहां कुहां जुइगु क्रमं नं निरन्तरता धाःसा कया हे च्वन। तर बजाः बन्द जुइ स्वयां झिंन्यागू मिनेट न्ह्यः हाकनं थहां वंगु नेप्सें अन्त तक थ्व गति काल। नेप्से थहां वनेगुली म्हिगः नं वाणिज्य बैंक व विकास बैंक समुहलं मू भूमिका म्हितूगु खः। वाणिज्य बैंक समुहया प्रमुख बैंकया शेयर भाः थहां वनेवं नेप्से नं थहां वंगु खः। बीओके व नविल बैंकया शेयरय् ६५/-, स्टायण्डर्डया ६१/- तका थहां वनेवं वाणिज्य समुहया उपसुचक ४ दशमलव ५४ अंकं थहां वनाः ५८४ दशमलव २९ अंकय् थ्यंगु दु। अथे हे छन्हु न्ह्यःया कालबिलं कुहां वःगु विकास बैंक समुह नं शुन्य दशमलव ४८ अंकं थहां वनाः ६५३ दशमलव ५१ अंकय् थ्यंगु दु ।
उखे छन्हु न्ह्यः थहां वंगु जलविद्युत समुह चिलिमे हाइड्रो पावरया शेयरय् ५७/ तका कुहां वयेवं दकलय् अप्वः २१ दशमलव ६५ अंकं कुहां वःगु दु। फाइनान्स समुह १ दशमलव ९२ अंकं कुहां वल। म्हीगया कालबिलय् थातं लानाच्वंगु विमा समुह धाःसा म्हिगःया कालबिलं ६ दशमलव ५२ अंकं कुहां वयाः ६०९ दशमलव शुन्य ४ अंकय् थ्यंगु दु ।
ख्वीन्हय्गू कम्पनीया कालबिलय् स्वीनिगूया कम्पनीया शेयर भाः कुहां वंगु दुसा नीछगूया थहां वंगु दु। गुगुं कम्पनीया भाः थातं लात। म्हिगः ख्वीच्याद्वः सछि व पीन्यागू कित्ता शेयर कालबिल जुयाः प्यंगू करोड छगू लाख व न्यय्गुद्वः तका दांया कालबिल जुल ।
दांया ल्याखं दकलय् अप्वः नेपाल एसबीआई बैंकं स्वीगुंगू लाख पीगुद्वः तका दांया कालबिल याःगु दु। पिपल्स फाइनान्सं अप्वः कमे याःगु दुसा चिलिमे हाइड्रो पावरं दकलय् अप्वः द्यापं फयेमाःगु दु ।
