कांग्रेस सामूहिक नेतृत्वय् न्ह्याः वनी : सिंह
नेपाली कांग्रेसया उपसभापति प्रकाशमान सिंहं कांग्रेसय आः एकल नेतृत्वय् न्ह्यामवनीगु धयादिसें सामूहिक नेतृत्वया अवधारणा कथं पार्टी न्ह्याः वने शुरु याःगु दाबी यानादीगु दु ।
येँया विश्वभाषा क्याम्पसय् शुक्रवाः ग्वसाःग्वःगु भिंतुना कालबिल यायेगु ज्याझ्वलय् न्ववानादिसें वयेकलं पार्टीया आधिकारिक निर्णय बिना हे प्रधानमन्त्रीं सुजाता कोइरालायात उपप्रधानमन्त्रीलय् नियुक्ति याःगु विषयलय् पार्टी दुने याकनं हे बहस जुइगु धयादिल ।
उपसभापति सिंहं सुजाता कोइरालायात पार्टीया निर्णय बिना उपप्रधानमन्त्री नियुक्त याःगु खँय् आपक्ति प्वंकादिसें पार्टी सभापति गिरिजाप्रसाद कोइरालां एकल ढंगं पार्टी संचालन यायेत स्वःगु द्वपं बियादिल । वयेकलं पार्टी सभापतिया अज्याःगु पलाः सफल मजुइगु नं दाबी यानादिल ।
वयेकलं प्रत्येक निर्णय एकल मखसें संस्थागत जुइमाःगु खँय् बः बियादिसें थुगु अभियानया निंतिं पार्टी लगेजूगु धयादिल । केन्द्रीय समितिं पार्टी सभापतियात अधिकार प्रत्यायोजन याःगु खँ गलत जूगु दाबी नं वयेकलं यानादिल ।
