उच्चस्तरीय संयन्त्र गठन लिपाः दक्वं समस्या समाधान : कोइराला
नेपाली कांग्रेसया सभापत गिरिजाप्रसाद कोइरालां दलत दथुइया सहमति, सहकार्य व एकताय् बः बियादिसें शीर्ष नेतातय् ब्वतिइ उच्चस्तरीय संयन्त्र गठन लिपाः दक्वं समस्या समाधान जुइगु दाबी यानादीगु दु ।
मोरङ कांग्रेस ज्याकू परिसरय् निर्माण जूगु वीपी कोइराला व नोना कोइरालाया झ्वाताःया बिहीवाः उल्लेज्या यानादिसें वयेकलं उच्चस्तरीय संयन्त्र निर्माण यायेगु ज्या माओवादीया कारणं लिबाःगु द्वपं बियादिल । वयेकलं माओवादी अध्यक्ष पुष्पकलम दाहाल 'प्रचण्ड' संयन्त्र निर्माण यायेत सहमत जूसां वयेक मेगू हे ज्याय् व्यस्त जुयादीगुलिं संयन्त्र निर्माण यायेत ई काःगु धयादिल ।
वयेकलं माओवादीयात जंगलं मूलधारया राजनीतिइ ह्येगु ज्या नं कांग्रेसं याःगु व आः न्हूगु संविधान निर्माण यायेगू जिम्मेवारी नं थःपिंसं हे पूवंकेगु दावी यानादिल । वयेकलं इतिहासं कांग्रेसयात गहन जिम्मेवारी ब्यूगुलिं चीचीधंगू खँय् तक्यना च्वनेमज्यूगु बिचाः प्वंकादिल ।
ज्याझ्वः लिपाः पत्रकारतय्सं केन्द्रीय समितिया बैठकय् छिगू विरोध जुयाच्वंगु दुनी धकाः न्यंगू न्ह्यसःलय् आक्रोसित जुसें कोइरालां उखे पाखे थःगु ध्यान मदुगु संक्षिप्त प्रतिक्रिया बियादील ।
