मंकाः संकल्प प्रस्ताव तयार यायेत स्वंगू दलया कार्यदल
वर्तमान राजनीतिक गतिरोध ज्यंकेगु निंतिं दक्वःसितं मान्य जुइगु मंकाः संकल्प प्रस्ताव तयार यायेत स्वंगू दलया स्वम्ह दुजः दुगु कार्यदल गठन याःगु दु ।
बिहीवाः सिंहदरवारय् एकीकृत नेकपा (माओवादी)या संसदीय दलया ज्याकूथी च्वंगु माओवादी, नेपाली कांग्रेस व नेकपा (एमाले)या बैठकय् संसदय् न्ह्यब्वइगु मंकाः संकल्प प्रस्तावया मस्यौदा दक्वसितं मन्या जुइ कथं तयार यायेगु निंतिं कार्यदल गठन याःगु खः । कार्यदलय् माओवादीया पाखें देव गुरुङ, एमालेया पाखें युवराज ज्ञवाली व कांग्रेस पाखें अर्जुननरसिंह केसी च्वनादीगु दु ।
बैठक लिपाः पत्रकारत लिसें खँल्हाबंला यानादिसें माओवादी उपाध्यक्ष डा. बाबुराम भट्टराईं मंकाः संकल्प प्रस्तावया मस्यौदाय् मंकाः भाय् दुथ्याकेत कार्यदल गठन याःगु कनादिल । वयेकलं सहमतिया निंतिं राष्ट्रपतिया असंवैधानिक पलाःयात प्रस्तावय् छुं नं छुं कथं दुथ्याकेमाःगु धयादिल । वयेकलं भविष्यय् थंज्याःगु गल्ती हानं मजुइत दलत सचेत जुइमाःगु कनादिल ।
कांग्रेस नेता अर्जुननरसिंह केसिं स्वंगू दलयात मान्य जुइगु प्रस्ताव तयार यायेगु निंतिं कार्यदल गठन जूगु धयादिल । वयेकलं स्वंगू दलत समस्या ज्यंकेगु सहमतिया नापं थ्यंगु प्रतिक्रिया बियादिल ।
थ्वस्वयां न्ह्य: स्वंगू दल दथुइ संसदय् मंकाः प्रस्ताव न्ह्यब्वयेगु सहमति जू कथं कांग्रेस व एमालें उकीया मस्यौदा तयार याःगु खःसा लिपा उकी असहमति प्वंकूसें माओवादीं संशोधन सहितया मस्यौदा तयार याःगु खः । उकी नं कांग्रेसं असहमति प्वंकेवं दक्वं दलतय्त मान्य जुइ कथंया मस्यौदा तयार यायेत स्वंगू दलया कार्यदल गठन याःगु खः ।
