एनआरएनया अध्यक्षय् हिराचन
येँय् जुयाच्वंगु गैर आवासीय नेपाली संघ (एनआरएन)या प्यक्वःगु विश्व सम्मेलनं संघया अध्यक्षय् देवमान हिराचनया सर्वसम्मतं चयन याःगु दु ।
मंगलवाः निसें न्ह्याःगु संघया प्यक्वःगु विश्व सम्मेलनय् अध्यक्ष पदया निंतिं स्वम्हेसि नां दर्ता जूगु खसां लिपा सहमति कायम यानाः हिराचनयात मंकाः उम्मेदवार दयेकेगु घोषणा या:गु खः । थ्वस्वयां न्ह्यः अध्यक्ष पदया निंतिं हिराचन नापं रामप्रताप थापा व भीम उदासं थ:थ:गु नां दर्ता याकूगु खः । बुधवाः बहनी तक जूगु सहलह लिपा हिराचनया नां सर्वसम्मत यायेगु सहमति जूगु खः । थ्वस्वयां न्ह्यः संघया उपाध्यक्ष जुयादिम्ह हिराचन जापानय् च्वनाः थःगु व्यवसाय संचालन यानाच्वनादीम्ह खः ।
हनिमयन्यंकया न्यय्नीगू देय्या न्यासः स्वयां अप्व प्रतिनितय्सं ब्वति कयाच्वंगु थुगु सम्मेलनय् नेपाःया आर्थिक विकासया थीथी क्षेत्रयात दुथ्याकाः काठमाडौं घोषणा पत्र जारी याइगु ज्याझ्वः दु । थ्वस्वयां न्ह्यः नेपाःया आर्थिक विकासय् संघया भुमिका व सम्भावनाया बारे निन्हु तक सहलह जूगु खः ।
