एनआरएनयात मातदान बाहेकया दक्वं अधिकार : प्रम
प्रधानमन्त्री माधवकुमार नेपालं गैर आवसीय नेपाली (एनआरएन)या निंतिं मतदानया अधिकार बाहेक मेगू दक्वं अधिकार प्रदान यायेत सरकार तयार जूगु खँ धयादीगु दु ।
बिहीवाः ब्रिटिस गोर्खा वेलफेयर सोसाइटीया प्रतिनिधित नाप खँल्हाबंला यानादिसें वयेकलं एनआरएनया निंतिं विशेष परिचय पत्र बीत सरकार तयार जूगु धयादिल । वयेकलं एनआरएन यात देय् दुने लगानीया निंतिं मैत्री वातावरण निर्माण यायेत सरकार गम्भीर रुपं लगेजुयाच्वंगु धयादिल ।
वयेकलं वेलफेयर सोसाइटीया प्रतिनिधितय्त नेपालय् लागानी यायेत मानसिक रुपं तयार जुइत इनाप यानादिसें सरकारं थनं लगानीया वातावरण निर्माण यानाः क्यनीगु धयादिल । वयेकलं एनआरएनयात नेपालय् निर्धक्क जुया लगानी यायेत इनाप यानादिसें विशेष यानाः शिक्षा क्षेत्रय् लगानी यायेत इनाप यानादिल ।
वयेकलं बेलायती सैनिक सरह गोर्खा सैनिकयात नं पेन्सन सुविधा बीत सरकार परराष्ट्र मन्त्रालय मार्फत लिवङ यायेगु जानकारी बियादिल ।
