ध्वाँय् हिलेगू विषयलय् विवाद कायम
राष्ट्रिय ध्वाँय् हिलेगु विषयलय् संवैधानिक समितिलय् जुयाच्वंगु सहलहलय् विवाद अझ तच्वःगु दु । संवैधानिक समितिया उपसमिति पाखें शुरु जूगु उगु विवादय् सभासद्त दथुइ पक्षय् व विपक्षय् तीव्र मतभेद जूगु दु ।
समितिया बुधवाः च्वंगु बैठकय् एकीकृत नेकपा (माओवादी) व आदिवासी जनजाति सभासदतय्सं ध्वाँय् हिलेमाःगु अडान काःगु दुसाः कांग्रेस, एमाले लगायत दक्वं दलया सभासद्तय्सं वर्तमान ध्वाँय्या पक्ष अडान काःगु दु ।
बैठकय् माओवादी सभासद् देव गुरुङं एकात्मक राज्यया अवधारणा जूगु ध्वाँय् बहुराष्ट्रिय राज्यया प्रतिनिधित्व यायेमफइगु धयादिल । वयेकलं बहुराष्ट्रिय राज्यया प्रतिकया चिं कथं न्हूगु ध्वाँय् दयेकेमाः धयादिल । कांग्रेसया सभासद् विमलेन्द्र निधिं हनिमय्न्यंक मौलिक पहिचान दुगु ध्वाँय् हिलेमज्यूगु बिचा: प्वंकादिल । वयेकलं न्हूगु व्याख्या यानाः आःया ध्वाँय्यात कायम यायेमाःगु धयादिल ।
आदिवासी जनजाति महासंघया अध्यक्ष व एमालेया सभासद् पासाङ शेर्पां आःया ध्वाँय् पूर्वाग्रही जूगु धयादिसें न्हूगु ध्वाँय्या निंतिं राष्ट्रिय म्येया निंतिं थें धेंधेंबल्ला यायेमाःगु धयादिल । एमाले पाखें सभासद् जुयादिम्ह शेर्पा बाहेक मेपिं एमालेया सभासद्तय्सं वर्तमान ध्वाँय् हे कायम यायेमाःगु पक्षय् न्ववाःगु खः ।
अथेहे परि थापा, सरित गिरी लगायत सभासदतय्सं थुगु विषययात राष्ट्रिय बहसया कथं पेश यानाः जक निष्कर्षय् थ्यंकेत सुझाव बीयादिल ।
बैठकय् ध्वाँय् नापं राष्ट्रिय प्रतिकया बारे नं विवाद जूगु दु । माओवादी लगायत दलतय्सं थुकीयात हिलेमाःगु माग याःगु दुसाः कांग्रेस, एमाले लगायत दलतय्सं थुकीयात यथावत तयेमाःगु माग याःगु खः ।
