कोइराला विराटनगरय्

पार्टी दुने सहलह हे मयासें थः म्हाय् सुजाता कोइरालायात उपप्रधानमन्त्री पदय् सिफारिस याःगुलिं पार्टी नेतातय्सं स्पष्टिकरण कायेगु धयाच्वंगु ईलय् नेपाली कांग्रेसया सभापति गिरिजाप्रसाद कोइराला विराटनगर झायादीगु दु ।

उपप्रधानमन्त्रीया नियुक्तिं पार्टी दुने अप्वयाच्वंगु विवादया दथुइ वयेक थःगु गृहगनगरय् झायादीगु खः । बिहीवाः कोइरालां मोरङय जिल्ला ज्याकूतथी तयातःगु वीपी कोइरालाया झ्वताः उल्लेज्या यानादीगु ज्याझ्वः दु । अथेहे वयेकलं कांग्रेस नेतृ नोना कोइरालाया झ्वताः उल्लेज्या यानादीगु नं ज्याझ्वः दु ।

वंगु सोमवाः कांग्रेस सभापति कोइरालाया सिफारिशय् प्रधानमन्त्री माधवकुमार नेपालं परराष्ट्रमन्त्री सुजाता कोइरालायात उपप्रधानमन्त्रीलय् नियुक्त यायेवं कांग्रेस पार्टी दुने विवाद ब्वलंगु खः । पार्टी कार्यवहाक सभापति सुशील कोइराला, उपसभापति रामचन्द्र पौडेल लगायत आपलं नेतातय्सं थुकी ‍आपत्ति प्वंकूगु दु ।