च्यादँ लिपा बल्ल बैठक

येँ (सन्ध्या टाइम्स)/ देय्या विकास प्रक्रियायात सही गति बीगु निंतिं गठन यानातःगु गुलिखे सरकारी समितित दँदँ निसें निष्कृय जुयाच्वंगु दु। अथे हे निष्कृय जुयाच्वंगु छगू समिति खः विकेन्द्रीकरण कार्यान्वयन तथा अनुगमन समिति। थुगु समितिया निष्कृय जुयाच्वंगु च्यादँ लिपा वयाः थौं बल्ल थुकिया बैठक च्वंगु दु ।

प्रधानमन्त्रीया अध्यक्षताय् दयेकातःगु समितिइ फुक्कं मन्त्री व सचिव दुजः कथं तयातःगु दु । थौंया बैठकय् थीथी मन्त्रालयया सचिवतय्सं थःपिनि मन्त्रालयया योजना विवरण न्ह्यब्वइगु खँ प्रधानमन्त्रीया ज्याकुथिं धाःगु दु ।

विकेन्द्रीकरण बारे सहलह यायेत थुगु विकेन्द्रीकरण तथा अनुगमन समितिया बैठक सःतूगु खः। बैठकय् विकासया बाँडफाँड, उकिया कार्यान्वयन व अनुगमनयात कयाः सहलह जुइ ।

अथे हे वंगु न्यादँ न्ह्यवंनिसें च्वने मफयाच्वंगु राष्ट्रिय विकास समस्या समाधान समितिया बैठक नं थौं हे च्वनेत्यंगु दु।
थ्व समितिया बैठक म्होतिं नं दँय् स्वक्वः च्वनेमाःगु प्रावधान दु। तर वंगु न्यादँ न्ह्यवंनिसें आः तक छक्वः हे थुकिया बैठक च्वनेमफुनि। थुगु समितिइ नं मन्त्री, सचिव व राष्ट्रिय योजना आयोगया दुजःत च्वनीगु प्रावधान दु ।