ध्वाँय् हिलेगु प्रस्तावं विवाद कायम
येँ (सन्ध्या टाइम्स)/राज्य पुनर्संरचना समितिइ जुयाच्वंगु विवादं यानाः अझ नं समितिया प्रतिवेदन तयार यायेत थाकुयाच्वंगु दु। समितिइ थौंकन्हय् नेपाःया राष्ट्रिय ध्वाँय् हीकेगु बारे जुयाच्वंगु विवाद अझ नं ज्यने मफुनि। नेकपा (माओवादीं) थौंकन्हय् छ्यलाच्वंगु निकू स्वकुं लाःगु कापःया ध्वाँय् हिलेमाः धइगु माओवादीया प्रस्तावय् आः माओवादी याकःचा लाःगु दुसा मेगु पार्टीतय्सं थ्वहे ध्वाँय् पाय्छि जू धकाः समर्थन यायेधुंकूगु दु ।
माओवादीं नेपाःया संघीय संरचनायात थ्व ध्वाँचं प्रतिनिधित्व याये मफइगु जूगुलिं थुकियात हीकेमाः धकाः माग यानाच्वंगु खः। थ्वहे मागय् सहमति जुइ मफुसेंलि समितिया प्रतिवेदन तयार यायेत थाकुयाच्वंगु खः ।
लिसें माओवादीं नेपाःया राष्ट्रिय जनावर नं सा मखुसें छपु न्यकू दुम्ह गैंडायात यायेमाः धकाः प्रस्ताव तयाच्वंगु दु। सायात हिन्दू द्यः कथं राष्ट्रिय जनावर माने यानातःगु खः ।
