नेवाः सीमा चाःहिलीगु मोटरसाइकल र्याली
येँ (सन्ध्या टाइम्स)/नेपाल संवत् न्हूदँया लसताय् नेवाः राष्ट्रिय मुक्ति मोर्चां थ्वहे वइगु कछलाथ्व षष्ठी (कार्तिक ७ गते) शनिवाः कुन्हु नेवाः राज्यया सिमांकन यायेगु कथं छगू मोटरसाइकल र्याली यायेत्यंगु दु ।
उगु मोटरसाइकल र्यालीं नेवाः राज्यया सिमाना चाःहिलीगु खँ नं धाःगु दु। येँया बसन्तपुलिं न्ह्याइगु उगु र्याली नेवाः लागाया सिमाना चाःहिले धुंकाः टिष्टुङ्गय् थ्यंकाः क्वचायेकेगु ग्वसाः दयेकातःगु दु ।
नेवाः राष्ट्रिय मुक्ति मोर्चाया छम्ह दुजलं जानकारी बिउ कथं नेवाः सिमाना किटान यायेगु निंतिं जुइत्यंगु थ्व र्यालीइ नेवाः मिलिसियां समेत ब्वति काइगु तयारी जुयाच्वंगु दु। उकिं थ्व र्यालीयात अर्थपूर्ण प्रर्दशनया रुपय् कयातःगु दु।
अथे हे नेवाः राष्ट्रिय मुक्ति मोर्चां कछलाथ्व पंचमि कुन्हु थःपिनि केन्द्रीय ज्याकू कोपुन्डोलय् भिंतुना कालबिल व तुच्चा ज्याझ्वः यायेगु ग्वसाः दयेकातःगु दु ।
अथे हे कछलाथ्व पारु कुन्हु न्हूदँ समारोह समितिपाखें बसन्तपुलिं न्ह्याकीगु भिंतुना र्यालीइ सक्रिय रुपं ब्वति कायेगु निर्णय नं मोर्चां याःगु दु ।
उखे मोर्चाया येँ १९ वडा कचापाखें न्हिनय् छगू सुकुन्दा र्याली पिकायेत्यंगु दु। मरुध्वाखां उगु र्याली पिकाइगु ग्वसाः दु।
थ्वहे झ्वलय् स्वन्ति नखः हनेगु तिथि विवादय् लानाच्वंगु झ्वलय् यलया ख्वनाय् कार्तिक १, २ व ३ गते छसिकथं हे लक्ष्मी पुजा, म्ह पुजा व किजा पुजा हनेगु निर्णय जूगु दु। स्थानीय लिधंसा पासा पुचःया पहलय् उगु निर्णय जूगु खः।
