नेप्से सामान्य थहां वन
येँ (सन्ध्या टाइम्स)/थुगु वालय् नेपाल स्टक एक्सचेन्जय् जूगु शेयर कारोबारं ६ सय अंकं नं कुहां वंगु नेप्से परिसूचक म्हिगः छुं भचा न्ह्यथनेबहगु सुधार जुयाः थहां वंगु दु। नेप्से म्हिगः थहां वंसा ६ सय अंकयात धाःसा पार याये मफुत। म्हिगः बजाः चालेवं थहां वंगु नेप्से घौछि लिपा छकः हाकनं छुं भचा कुहां वंगु खःसा लिपा मदिक थहां वंगु खः। तर बजाः बन्द जुइत्ययेकाः ६ अंकं नं पुलेधुंकूगु नेप्से लिपांगु इलय् वया कुहां वःसां छन्हु न्ह्यः स्वयां शुन्य दशमलव ४३ अंकं थहां वनाः ५९८ दशमलव ८ अंकय् थ्यन। सेन्सेटिभ नं शुन्य दशमलव शुन्य २ अंकं थहां वंगु दुसा फ्लोट जक शून्य दशमलव शुन्य ३ अंकं कुहां वल ।
छन्हु न्ह्यःया कारोबारं कुहां वंगु नेप्से म्हिगः मेमेगु बैंकया शेयर भाः कुहां वंसां एभरेष्ट बैंक, लक्ष्मी बैंक व लुम्बिनी बैंकया शेयरय् भाः थहां वनेवं थुगु समुहया उपसुचक १ दशमलव १४ अंकं थहां वनाः ५७९ दशमलव ७५ अंकय् थ्यंगु दु। जलविद्युत समुह म्हिगः नं ३ दशमलव २७ अंकं थहां वनेवं ८३४ दशमलव ९२ अंक थ्यन ।
मेखे म्हिगः नं विकास बैंक समुह कुहां वंगु दु। थुगु समुहया उपसूचक २ दशमलव ५५ अंकं कुहां वनाः ६५१ दशमलव ७८ अंकय् थ्यंगु दु। अथे हे फाइनान्स समुह नं २ दशमलव ५८ अंकं कुहां वयाः ६२८ दशमलव ४३ अंकय् थ्यंगु दुसा विमा समुह धाःसा यथावत हे जुल ।
नेप्से परिसुचक कुहां वःसां छन्हे न्ह्यः न्ह्यथनेबह जुइकथं शेयर व दांया कारोबार थहां वंगु खःसा म्हिगः धाःसा नेप्से थहां वंसा शेयर ल्याः व दांया कारोबार कुहां वल। छन्हु न्ह्यः झिंनिगू लाख स्वीखुद्वः न्यासः व स्वीन्यागू कित्ता शेयरं झिंन्हय्गू करोड नीगू लाख नीस्वद्वः तका दांया कारोबार जूगु खः। तर म्हिगः न्हय्च्यागू लाख न्हय्सः व न्यय्प्यंगू कित्ता शेयर न्याये-मी जुयाः प्यंगू करोड चय्च्यागू लाख व नीच्याद्वः तका दांया जक कारोबार जुल ।
कारोबार कम्पनीमध्ये स्टायण्डर्ड चार्टर्ड बैंकं दकलय् अप्वः ख्वीन्यागू लाख चय्निद्वः तका दांया कारोबार याःगु दु। मर्चेण्ट फाइनान्सं दकलय् अप्वः कमे याःगु दुसा नविल बैंकया प्रमोटर शेयरं दकलय् अप्वः द्यापं फयेमाल ।
