सहमति मजूसाः देय् गम्भीर दुर्घटनाय् लाइगु : ओली

नेकपा (एमाले)या प्रभावशाली नेता केपी शर्मा ओलीं राजनीतिक गतिरोध ज्यंकेगु निंतिं जुयाच्वंगु कुतः असफल जुसाः देया निंतिं दुर्भाग्य जुइगु खँ धयादीगु दु ।

बुधवाः झापाया बिर्तामोडय् संचारकर्मीत नाप खँल्हाबंला यानादिसें नेता ओलीं सम्वादया लँपू असफल जुसाः देय् गम्भीर दुर्घटनाय् लायेफइगु धयादिल । स्वंगू प्रमुख दलत दथुइ जारी सहलह पाखें निकास पिहांमवसाः देय् हानं भिडन्तय् वनेफुगु पाखे संकेत यानादिसें नेता ओलीं अज्याःगु दुर्घटना जुइगु पाखें दलतय्त रोके यायेमाः धयादिल ।

स्वन्तिया लसताय् जुइगु छगू ज्याझ्वलय् ब्वति कायेत झापा थ्यंकादिम्ह नेता ओलीं राजनीतिक दलतय्सं थःथःगु स्वार्थ त्वःता जनता व देय्या समस्याय् केन्द्रीत जुइत इनाप यानादिल । वयेकलं दलतय्सं तत्काल थःगु जिद्धि त्वःतुसाः जक राजनीतिक गतिरोध ज्यनीगु धयादिल ।