बाढी प्रभावितया निंतिं झिंन्यागू करोड : प्रम
प्रधानमन्त्री माधवकुमार नेपालं सुदूर व मध्य पश्चिमय् बाढी प्रभावित क्षेत्रय् राहत व पुनःस्थापनाया ज्या तीव्र रुपं जुयाच्वंगु खँ धयादीगु दु ।
बुधवाः संसदया प्राकृतिक स्रोत साधन समितिया बैठय् सभासदतय्सं न्ययंगु न्यसःया लिसः बियादिसें प्रधानमन्त्री नेपालं बाढी प्रभाविततय् राहत व पुनःस्थापनाया निंतिं सरकारं झिंन्यागू करोड निकासा याःगु धयादिल । क्षतिया विवरण संकलन जुयाच्वंगु धयादिसें वयेकलं राहत व पुनःस्थापना ज्याया निंतिं स्थानीय प्रशासनया सक्रियता अप्वयेका:गु जानकारी बियादिल ।
प्रधानमन्त्री नेपालं थः मंगलवाः तिनी बाढी प्रभावति क्षेत्रया निरीक्षण यानावयाःगु जानकारी बियादिसें राहत व पुनःस्थापना ज्या तीव्र यायेत स्थानीय प्रशासनयात निर्देशन बियाःगु धयादिल ।
सभासद्तयसं न्ह्यावलं जुयाच्वनीगु थंज्याःगु प्राकृतिक प्रकोप नियन्त्रणया निंतिं सरकारं ठोस पलाः मछीगु, राहत व पुनःस्थापनाया ज्या प्रभावकारी मजूगु गुनासो प्वंकूगु खः । चलखं पहाडी राजमार्गत अवरुद्ध जूगु कारणं अज्याःगु जिल्लाय् खाद्यन्न संकट जुइफुगु बारे नं सभासदतय्सं प्रधानमन्त्रीया ध्यानाकर्षण याकूगु खः ।
