पार्टीया निर्णय बमोजिम हे उपप्रधानमन्त्री : खाँड
पार्टी दुने सहलह जुइ : सुशील कोइरालो
सिंचाई मन्त्री बालकृष्ण खाँडं कांग्रेस नेतृ सुजाता कोइरालायात उपप्रधानमन्त्री नियुक्त यायेगु निंतिं कांग्रेस केन्द्रीय कार्यसमिति व संसदीय दलया निर्णय बमोजिक हे सभापति गिरिजाप्रसाद कोइरालां सिफारिस याःगु खँ धयादीगु दु ।
नारायणगढय् पत्रकारत नाप खँल्हाबंला यानादिसें वयेकलं सरकारय् छ्वयेगु मन्त्रीतय् नां सिफरिसया जिम्मा संसदीय दल व केन्द्रय समितिं थ्वस्वयां न्ह्यः हे सभापतियात ब्यूगुलिं उपप्रधानमन्त्रीलय् सुजाताया नां सिफारिस याःगु धयादिल । वयेकलं सभापति कोइरालां थःगु पुलांगु हे जिम्मेवारी जक पूवंकूगु धयादिल ।
मन्त्री खाँडं तःधंगू पार्टी जूगुलिं उगु पदया निंतिं कांग्रेसं दाबी यायेदइगु स्वभाविक जूगु धयादिल । वयेकलं उपप्रधानमन्त्रीलय् कोइरालाया नियुक्त लिपाः सरकार अझ बल्लाःगु धयादिसें सरकार क्वदलीगु खँ प्रधानमन्त्रीय कार्यशैली निर्भर जुइगु धयादिल ।
उखे कांग्रेसया कार्यवहाक सभापति सुशील कोइरालां परराष्ट्रमन्त्री सुजाता कोइरालायत उपप्रधानमन्त्री नियुक्त याःगु विषयलय् पार्टी दुने सहलह जुइगु धयादिल । सुर्खेत बिमानस्थलय् पत्रकारत नाप खँल्हाबंला यानादिसें वयेकलं उपप्रधानमन्त्री नियुक्त यायेगु प्रधानमन्त्रीया विशेष अधिकार जूसां थुकीया बारे पार्टीयात जानकारी मदुगु धासें असन्तुष्टि प्वंकादिल ।
