राष्ट्रपति यादव असन्तुष्ट
येँ (सन्ध्या टाइम्स)/ न्ह्यानाच्वंगु राजनीतिक गतिरोधयात कयाः राष्ट्रपति डा. रामवरण यादवं असन्तुष्टि प्वंकादीगु दु।
थौं सुथय् आर्मी अफिसर्स क्लबय् गैर आवासीय नेपाःमितय् सम्मेलनया उलेज्या यानादिसें वय्कलं उगु असन्तुष्टि प्वंकादीगु खः ।
वय्कलं आः न्ह्यानाच्वंगु राजनीतिक अन्योलतायात याकनं चीकेमाःगु खँय् बः बिसें संविधानसभां हे फुक्कं समस्याया हल पिकायेत नं इनाप यानादिल। 'संविधानसभायात मन्थन यानाः अमृत पिकाये नु, हलाहल मखु' राष्ट्रपति यादवं धयादिल ।
वय्कलं निषेधया राजनीति प्रति तिक्तता प्वंकुसें प्रजातन्त्रय् सुयातं ककु तिनाः पितिना छ्वयेगु अधिकार दइ मखु धयादिल ।
उगु हे ज्याझ्वलय् न्ववासें उपप्रधान व परराष्ट्र मन्त्री सुजाता कोइरालां सरकार गैरआवासीय नेपालीतय् हितया निंतिं प्रतिवद्ध दुगु खँ कनादिल ।
वय्कलं गैरआवासीय नेपाःमिया निंतिं सरकारं फुगु ज्या यायेगु व उमिसं नेपालय् याइगु लगानीया सुरक्षा यायेगु बचं नं बियादीगु दु ।
स्वन्हु तक न्ह्याइगु सम्मेलनय् झिगू सत्रय् थीथी विषययात कयाः कार्यपत्र न्ह्यब्वइगु ज्याझ्वः दु ।
