ज्यापु संस्कृति विकास कोषया दँ मुँज्या
येँ (सन्ध्या टाइम्स)/ज्यापु संस्कृति विकास कोषया च्याक्वःगु दँ मुँज्या वंगु शनिवाः थनया क्षत्रपाटी पार्टी प्यालेसय् क्वचाल। कोषया नायः चक्रमान डंगोलया सभापतित्वय् जूगु उगु मुँज्याय् ङत त्वाःया मूधामि (अजिमा) नापं नायः लक्ष्मीनारायण महर्जन मूपाहां कथं झायादीगु खः ।
ज्याझ्वलय् न्हूदँ समारोह समिति नायः व कोषया संरक्षकलिसें सभासद् तीर्थराम डंगोल, ज्यापु महागुथि केन्द्रीय न्वकु राजभाइ ज्यापु, ज्यापु महागुथि येँ महानगर समितिया नायः मोहनकृष्ण डंगोल, ज्यापु प्राज्ञ प्रा.डा. खड्गमान श्रेष्ठ, प्रा. गोविन्दनारायण ज्यापूपिं पाहांकथं झाःगु खः ।
मुँज्याय् ज्यापु संस्कृति विकास कोषया पलिस्थानिसेंया प्रगति विवरण न्ह्यब्वःगु खः। ज्याझ्वलय् न्ववासें सभासद् तीर्थराम डंगोलं थुगुसीया न्हूदँ तःजिक हनेगु निंतिं उपस्थित सकल त्वाःखलःया प्रतिनिधिपिंत इनाप नं यानादिल।
उगु हे सभां ज्यापु दिवस २०६६ हनेत ङत त्वाः खलःयात पाःब्व लःल्हाःगु दु ।
