मुनि बिहारय् भन्तेपिंत चीवर दान
ख्वप (सन्ध्या टाइम्स)/ ख्वपया मुनि विहारय् वंगु आइतवाः नीखुम्ह भन्तेपिंत कठिन चीवर दान यात ।
थाइल्याण्ड नरेशया प्रतिनिधि कथं पुलांम्ह विदेशमन्त्री सरोज छवान विराज व नेपाःया लागिं थाइल्याण्डया कार्यवाहक राजदूत आशी मामनीं उगु चीवर दान यानादीगु खः। नापं उगु इलय् थीथी ज्वलं नं दान याःगु खः।
थाई नरेशपाखें वःगु न्यागू लाख, नीन्याद्वः व न्यासः व स्वीतका दां नापं ८४ द्वः व न्यासः तका दां नापं थाई नरेशया नीद्वः तका दां मुनि बिहारयात लःल्हाःगु खः।
थुगु कठिन चीवर दान याये न्ह्यः थाइल्याण्डया पुलांम्ह विदेशमन्त्री सरोज छवान विराज व नेपाःया लागिं कार्यवाहक राजदूत आशी ममनीयात ख्वपया दरवार लागाय् शोभायात्रा यानाः लसकुस यासें मुनि बिहारय् तक थ्यंकेहःगु खः ।
राजदूतावासया कर्मचारीत हे वयाः कठिन चीवर दान ज्याझ्वः जूगु खः। मुनि बिहारय् स्वला तक जूगु वर्षावास पूवंगु लसताय् थुगु कठिन चीवर दान ज्याझ्वः जूगु खः ।
