मुनिकारत छप्पँ जूगु घोषणा
येँ (सन्ध्या टाइम्स)/थीथी खँय् विवाद जुयाः ब्यागलं च्वनाच्वंगु मागल त्वाः भोताहिति छप्पँ जूगु दु। गुथियार व त्वाः खलःया दथुइ निदँ न्ह्यःनिसें जुया वयाच्वंगु विवाद ज्यंगु खँ मागल भोताहिति त्वाः खलः तदर्थ समितिया छ्याञ्जे धर्म मुनिकारं पिथंगु प्रेस विज्ञप्तिइ न्ह्यथनातःगु दु ।
विवाद ज्यंकेगु निंतिं त्वाः खलः पाखे सिंहबहादुर मुनिकार व धर्म मुनिकारं ताः ई न्ह्यवंनिसें कुतः याना वयाच्वंगु व वंगु भाद्र १७ गते कुन्हु च्वंगु मुँज्यां थीथी गुथिया फुक्क चलअचल सम्पत्तियात आवंलि त्वाःखलःया मंकाः सम्पत्ति यायेगु लगायतया न्यागू बुँदाय् सहमति जूगु खँ नं प्रेस विज्ञप्तिइ न्ह्यथनातःगु दु ।
उगु हे सहमतिया लिधँसाय् त्वाः खलःपिनि रोहबरय् गुथियारपिंपाखें हरिकृष्ण मुनिकार, नन्दलाल, हरिकृष्ण गंगामाया सत्यनारायण राजेन्द्र मुनिकार त्वाः खलःपाखें अध्यक्ष सिंहबहादुर मुनिकार लगायत सकलें पदाधिकारीपिंसं सम्झौता पतिइ ल्हाःचिं तयाः एकता जूगु घोषणा याःगु खः ।
उगु हे मुँज्यां सिंहबहादुर मुनिकारया अध्यक्षताय् मुनिकार समाज तदर्थ समिति नं स्वंगु दु ।
