१, २ व ३ गते स्वन्ति
बिदा मबिउसा बन्द
येँ (सन्ध्या टाइम्स)/ कछलाथ्व पारु कुन्हु न्यायेका वयाच्वंगु नेपाल संवत्या न्हूदँ व म्हपुजा मान्यताया अःखः पञ्चाङ्ग निर्णायक समितिं नरक चतुर्दशी कुन्हु (असोज ३१ गते) लक्ष्मी पुजा धकाः भ्रम न्यंकेत्यंगु द्वपं नेवाः देय् दबुलिं बिउगु दु ।
म्हिगः रिपोर्टर्स क्लबय् छगू पत्रकार सम्मेलन यासें कार्तिक १ गते लक्ष्मीपुजा, २ गते नेपाल संवत्या न्हूदँ व म्हपुजा अले ३ गते किजापुजा यायेत नं नेवाः देय् दबूया नायः नरेश ताम्रकारं आह्वान यानादिल दु ।
पञ्चाङ्गं निर्णायक समिति अझ नं जुजुं सिन्हः तीगु साइत पिकायेगु परम्पराय् हे तक्यनाच्वंगु द्वपं बिसें पञ्चाङ्ग दयेके न्ह्यः उमिसं स्वयम्भु, जनबहाःया वज्राचार्य व वैदिक प्रतिष्ठानया राजोपाध्यायत लिसे सहलह यायेमाःगु माग नं वय्कलं यानादिल । अथे हे देय् दबुलिं सरकारं ३ गते किजापुजा कुन्हु सार्वजनिक विदा बीत नं वय्कलं माग यानादिल ।
अथे हे नेपाल लोकतान्त्रिक नेवाः संघया नकतिनि च्वंगु मुँज्यां नं स्वन्ति नखः झ्वःलिकं हनेगु निर्णय याःगु दु। संघं १ गते लक्ष्मीपुजा, २ गते म्हपुजा व ३ गते किजापुजा यायेगु धासें कार्तिक ३ गते सरकारी विदा बीत माग याःगु दु।
उखे नेवाः जागरण मञ्चं स्वन्ति नखः कार्तिक १ निसें ३ तक तक झ्वःलिं हे हनेगु निर्णय यासें ३ गते किजा पुजा कुन्हु नं सार्वजनिक बिदा बीत माग याःगु दु। वकुन्हु बिदा मबिल धाःसा यातायात बाहेक ज्याकू, शिक्षण संस्था, पसः, बजाः, फुक्कं बन्द यानाः विरोध प्रकट यायेत नं मञ्चं सकसितं इनाप याःगु दु ।
