'लुँयाम्ह झंगः' क्यनाः 'तान् ज्यो' न्ह्याकल
ग्वंगः क्वसः, महानर्क थेंज्याःगु नेवाः संकिपा दयेके धुंकूगु कम्पनी सुकुन्दा फिल्मस् प्रा. लिं. ग्वंगः क्वसःया सिक्वेल कथं दयेकूगु 'लुँयाम्ह झंगः ग्वंगः क्वसः - २ या प्रिमियर शो सम्पन्न जूगु दु। नेपाल प्रशासनिक प्रशिक्षण प्रतिष्ठानया हलय् जूगु उगु प्रिमियर शोलय् मू पाहां नेपाःया नांदंम्ह फाइट डाइरेक्टर राजेन्द्र खड्गी व लुँयाम्ह झंगःया च्वमि वासु शाहीं मंकाः रुपं संकिपाया न्हापांगु क्यनेज्या प्रिमियर शोया उलेज्या याःगु खः ।
नेवाः संकिपा विशेष यानाः स्वनिगः दुनेया लु (दृश्य) जक दयाच्वनीगु खः। तर 'लुँयाम्ह झंगः' संकिपा दकलय् न्हापां स्वनिगलं पिनेया नेवाः वस्ती बन्दीपुरयात बाखंया मू लोकेशन दयेकाः न्हूगु सवाः बीगु कुतः यानातःगु दु। लोक साहित्यकार करुणाकर वैद्यया बाखंया लिधंसाय् दयेकूगु थ्व संकिपाय् लुधंकाः खेँय् नयेगु लोभं लहीपिं निम्ह तिपू (बासु शाही व गंगा शाही) व खाया ला नये पल्के थूपिं निम्ह तिपू (सुरेन्द्र के.सी. व पल्पसा डंगोल)या बाखं न्ह्यब्वया तःगु दु।
न्हूदँ ११३० या लसताय् 'लुँयाम्ह झंगः' ग्वंगः क्वसः-२' या डिभिडि /भिसिडी या बजारय् पिहां वइगु जूगु दु ।
थ्व संकिपाया प्रिमियर शो कुन्हु हे सुकुन्दा फिल्मस प्रा.लि.या मेगु न्हूगु संकिपा 'तान्ज्यो' या भिं साइत यासें न्हापांगु शुटिंग नं न्ह्याकूगु खः। भिं साइत ज्याझ्वलय् नेवाः जागरण संकिपा मञ्चया प्रमुख विजयरत्न असंबरे नैंक्याः तछ्याःगु खःसा न्हापांगु शटया निंतिं मू पाहां राजेन्द्र खड्गीं क्ल्याप याःगु खः। न्हापांगु लुइ (दृश्यय्) वासु शाही व पल्पसा डंगोलं अभिनय याःगु खः। सुकुन्दा फिल्मस् प्रा.लि.या थ्व निगुलिं संकिपाया निर्देशक सुरेन्द्र के.सी. खः। 'न्याल्लब्या' संकिपाय् साहु जुयाः म्हितुसांनिसें आपालं नेवाः संकिपाय् अभिनय यो धुंकूम्ह सुरेन्द्र के.सी. 'मुला साग' नामं लोकंव्हाःम्ह कलाकार खः ।
