'उलिंचिया बाखं थुलिंचा' या ५० ब्व
नेटिभि - २ या धकिमय् क्यना वयाच्वंगु नेवाः टेलि सिरीयल 'उलिंचिया बाखं थुलिचा' या ५० (न्यय्ब्व) पूवंगु लसताय् थनया अशोक हलय् माननीय सूचना तथा सञ्चार मन्त्री शंकर पोखरेल भाजुया मू पाहांसुइ छगू तःजिगु लसता ज्याझ्वः सम्पन्न जुल। सिने ग्राफिक्सं दयेकाच्वंगु थ्व सिरियलय् छपु हे बाखं मखुसें बिस्कं बिस्कं बाखं माः हनाः न्ह्यब्वया वयाच्वंगु खः ।
अमृतमान महर्जनं निर्देशन यानाच्वंगु थ्व सिरीयल ५० ब्व पूवंगु लसताय् थुकिया कलाकार, प्राविधिक, विज्ञापनदाता लगायत ग्वाहालिपिंत नं ट्रफी बियाः सम्मान याःगु खः। ज्याझ्वलय् मू पाहां सञ्चार मन्त्री शंकर पोखरेल, संस्कृतिविद् सत्यमोहन जोशी, निर्देशक अमृतमान महर्जन, लक्ष्मी महर्जन, नेवाः देय् दबूया नायः नरेश ताम्राकार लगायतया वक्तातसें न्ववानादीगु खः ।
थ्वहे ज्याझ्वलय् सिने ग्राफिक्सपाखें दयेकेत्यंगु न्हूगु नेवाः संकिपा 'सेरी बन्जाः' या शुभ मुहुर्त नं जूगु खः। शुभ मुहुर्त शटय् अमृतमान महर्जन व मन्जु श्रेष्ठं अभिनय यानादिल। बौद्ध जातक बाखनय् आधारित सेरी बन्जाः' या निर्देशन अमृतमान महर्जनं हे याइगु खःसां मुहुर्त शटया निर्देशन धाःसा नेवाः जागरण संकिपा मञ्चया प्रमुख बिजयरत्न असंबरें यानादिल। मुहुर्तया निंतिं भाजु सत्यमोहन जोशीं क्ल्याप यानादिल। अथे हे तुं मू पाहां सञ्चार मन्त्री पोखरेलं क्यामेराया स्वीच अन यानादीगु खः ।
