न्हूदँया लसताय् जागरण मञ्चया थीथी ज्याझ्वः
येँ (सन्ध्या टाइम्स)/नेपाल संवत् न्हूदँ ११३० या लसताय् नेवाः जागरण मञ्चं थीथी ज्याझ्वः यानाः हनीगु जूगु दु।
जागरण मञ्चया केन्द्रीय तदर्थ समितिया मुँज्यां न्हूदँया लसताय् नेपालभाषा मंकाः खलः न्हूदँ समारोह समितिया ग्वसालय् कछलाथ्व पारु कार्तिक २ गते बसन्तपुलिं न्ह्याइगु भिंतुना र्याली, नेपाल संवत्या प्रवर्तक शंखधर साख्वाःया प्ले कार्ड व न्हूगु दँया भिंतुना प्लेकार्ड सहित र्यालीइ ब्वति कायेगु निर्णय याःगु दुसा उगु र्याली ब्वति कायेत जागरण मञ्चया सकल दुजःलिसें मञ्चया शुभेच्छुक, समर्थकपिंत इनाप याःगु दु। अथे हे मञ्चया तदर्थ समितिया ग्वसालय् कछलाथ्व ६ कार्तिक ७ शनिवाः मञ्चया ज्याकू ध्वाखाबहालय् बृहत भिंतुना तुच्चा ज्याझ्वः यायेगु निर्णय याःगु दु ।
थ्वहे झ्वलय् कछलाथ्व १२ कार्तिक १३ गते मञ्चया कवः संकिपा मञ्चया ग्वसालय् च्यासःम्हं मल्याक ल्याय्म्ह ल्यासेतय्गु सहभागिताय् 'नेवाः संगीत नाइट' ज्याझ्वः याइगु जूगु दु। संकिपा मञ्चया सचिव सुरेन्द्र तुलाधरया संयोजकत्वय् जुइत्यंगु नेवाः संगीत नाइट ज्याझ्वलय् नेपालभाषाया रक, पप म्येँ न्ह्यब्वइ ।
संकिपा मञ्चया हे ग्वसालय् संकिपाकःमि सम्मान ज्याझ्वः व न्हूदँ सांस्कृतिक ज्याझ्वः थ्वहे कछलागा १३ कार्तिक २८ गते शनिवाः थनया राष्ट्रिय नाचघरय् याइगु जूगु दु ।
न्हूदँ न्हूकथं तःजिक हनेत थुगुसी दकलय् न्हापां मञ्चया कवः नेवाः जागरण व्यापारी मञ्चं 'कार र्याली' याइगु जूगु दु। मञ्चया दुजः दिनेश श्रेष्ठया संयोजकत्वय् जुइत्यंगु उगु कार र्याली थ्वहे वइगु कछलागा ५ कार्तिक २१ गते शनिवाः थनया क्षत्रपाटी कुश्लेचौरं न्ह्याइ। उगु कार र्यालीइ सच्छिगः जक कार दुथ्याकेगु ग्वसाः दयेकातःगु दु ।
