नेप्से कुहां वनेगु मदिउनि
येँ (सन्ध्या टाइम्स)/नेपाल स्टक एक्सचेन्जय् शेयर कारोबारं नेप्से कुहां वनेगु क्रम अझं दिउगु मदु। वाःया न्हापांगु न्हिया ल्याखय् दां व शेयर कालबिल न्ह्यथनेबहः जुइक थहां वंसां म्हिगः नं नेप्सेया ल्याः धाःसा अझं कुहां वंगु दु। म्हिगः बजाः चालेवं थहां वनेगु पलेसा कुहां वनेगु शुरु जूगु खः। झण्डै बाघौ लिपा हाकनं थहां वने धुंकूगु नेप्से परिसूचक निताः त्या ई लिपा तक थ्व थातं हे च्वनाच्वंगु खः। तर बजाः बन्द जुइ स्वयां बाघौ न्ह्यः कुहां वंगु नेप्सें लिपा तकं थ्वहे गति काल ।
थुगु वाःया न्हापांगु न्हिया कारोबारं नेप्से ६ सय अंकं कुहां वंगु खःसा थ्व ल्याः अझं पुले फुगु मदुनि। म्हिगः नं नेप्से शुन्य दशमलव ९६ अंकं कुहां वयाः ५९८ दशमलव ३७ अंकय् थ्यन। सेन्सेटिभ नं शुन्य दशमलव ९९ अंकं कुहां वःगु दुसा फ्लोट शुन्य दशमलव २१ अंकं कुहां वंगु दु ।
मेमेगु समुहया भाः थहां वंसां वाणिज्य व विकास बैंक समुहलय् भाः कुहां वयेवं नेप्से नं कुहां वःगु खः। वाणिज्य समुह दकलय् अप्वः ४ दशमलव १५ अंकं कुहां वयाः ५७८ दशमलव ६१ अंकय् थ्यंगु दु। अथे उखे विकास बैंक समुह नं शुन्य दशमलव १७ अंकं कुहां वयाः ६५४ दशमलव ३३ अंकय् थ्यन ।
मेखे म्हिगःया कारोबार जूगु निगुलिं जलविद्युत समुहया भाः थहां वनेवं थुगु समुहया उपसुचक १ दशमलव ३५ अंकं थहां वनाः ८२७ दशमलव ६९ अंकय् थ्यंगु दु। दकलय् अप्वः थहां वंगु विमा समुह ६ दशमलव ६२ अंकं थहां वनाः ६१५ दशमलव ५६ अंकय् थ्यन। फाइनान्स समुह नं शुन्य दशमलव शुन्य ६ अंकं थहां वनाः ६३१ दशमलव शुन्य १ अंकय् थ्यंगु दु ।
नेप्सेय् म्हिगः ताः ई लिपा शेयर न्याये-मी ज्या उल्लेख्य रुपं थहां वंगु दु। म्हिगः छन्हु हे जक झिंनिगू लाख स्वीखुद्वः न्यासः व स्वीन्यागू कित्ता शेयर न्याये-मी जुयाः झिंन्हय्गू करोड नीगू लाख नीस्वद्वः तका दांया कारोबार जुल। दकलय् अप्वः १,१४५,५६० कित्ता शेयर न्याये-मी जूगु नेशनल हाइड्रो पावरं दांया ल्याखं नं अप्वः कारोबार याःगु दु। सिटिजन्स बैंकं दकलय् अप्वः कमे याःगु दुसा लर्डबुद्ध फाइनान्सियलं दकलय् अप्वः गुमे याःगु दु ।
