माओवादीया संशोधन प्रस्तावप्रति कांग्रेस असहमत
एकीकृत नेकपा (माओवादीं) न्ह्यब्वःगु संशोधन प्रस्तावय् नेपाली कांग्रेसं असहमति प्वंकूगु दु । माओवादीं राजनीतिक गतिरोध अन्त्यया निंतिं कांग्रेस व एमालें तयार याःगु मंकाः संकल्प प्रस्तावय् राष्ट्रपतिया पलाः भिंकेमाःगु माग सहित संशोधन प्रस्ताव न्ह्यब्वःगु खः ।
माओवादीया संशोधन प्रस्तावय् सहलह यायेत कांग्रेस व एमाले दथुइ मंगलवाः कांग्रेसया संसदीय दलया ज्याकूथी च्वंगु बैठकय् कांग्रेसं राष्ट्रपतिया बारे संसदय् सहलह जुइमफइगु अडान यथावत तःगु दु ।
बैठक लिपाः संचारकर्मीत नाप खँल्हाबंला यानादिसें कांग्रेस उपसभापति रामचन्द्र पौडेलं माओवादीया संशोधन प्रस्तावय् अध्ययन यायेगु ज्या जुयाच्वंगु धयादिसें माओवादी न्हापा स्वयां कडा जुया प्रस्तुत जूगु धयादिल । वयेकलं कांग्रेसं निपलाः ल्यूने वनाः लचकता क्यंगू तर माओवादी थःगु अडानय् झन न्ह्याः वंगु कनादिल ।
कांग्रेस व एमालें न्ह्यब्वःगु मंकाः संकल्प प्रस्तावय् संशोधन यानाः माओवादीं तत्कालीन सेनापति प्रकरणय् राष्ट्रपतिं ल्ह्वंगु पलाः असंवैधानिक जूगु व उकीयात भिंकेत संसदं सरकारयात निर्देशन बीमाःगु खँ न्ह्यथंनातःगु दु ।
सहिमति मालेत स्वंगू प्रमुख दलया दथुइ मंगलवाः हे बैठक च्वनीगु जुगु दु ।
