दलतय्त सहमतिलय् वयेत राष्ट्रपतिया इनाप
राष्ट्रपति डा. रामवरण यादवं संविधानसभा पाखें सहलह यानाः सहमति मालेत दलतय्त इनाप यनादीगु दु ।
मंलगवाः निसें येँय् शुरु जूगु गैरआवसीय नेपाली संघ (एनआरएन)या प्यक्वःगु विश्व सम्मेलनयात सम्बोध यानादिसें राष्ट्रपति यादवं देश संक्रमणकाल पाखें न्ह्या: वनाच्वंगुलिं देशया निकास व विकासया निंतिं दलत दथुइ कायम मतभेद क्वचायेकेत इनाप यानादीगु ख: ।
सेनापति प्रकरणय् राष्ट्रपतिं ल्ह्वंगु पलाः असंवैधानिक जूगु व थुकीया बारे संसदय् सहलह यायेमाःगु माग यानाः प्रमुख प्रतिपक्षी दल एकीकृत नेकपा (माओवादीं) आन्दोलन यानाच्वंगु ईलय् राष्ट्रपति यादवं दलत दथुइ मतभेद अन्त्य यायेगु निंतिं संविधानसभाय् सहलहया लँपू ल्येत इनाप यानादीगु खः ।
ज्याझ्वलय् राष्ट्रपति यादवं लोकतन्त्रय् अधिनायकवादया स्थान मदइगु धयादिसें आर्थिक, न्याययीक लैङ्गीक थंज्याःगु खँया समान्ता बिना लोकतन्त्र गबलें नं संस्थागत मजुइगु बिचाः प्वंकादिल । वयेकलं लोकतान्त्र प्राप्त जुसां थुकीयात संस्थागत याये ल्यंदनीगु धयादिसें दलत छप्पँ जुसाः जक लोकतन्त्रयात संस्थाग यायेफइगु धयादिल ।
वयेकलं दक्व नेपाःमित छप्पँ जुइमाःगु धयादिसें विस्तृत शान्ति सम्झौतायात साक्षी तयाः संविधान निर्माणया निंतिं गम्भीर जुइत दलतय्त इनाप यानादिल ।
राष्ट्रपति यादवं जनआन्दोलन सफल यायेत व लोकतन्त्र प्राप्तिया आन्दोलनय् गैरआवसीय नेपालीतय्सं नं ग्वाहालि याःगु व थुकीयात सरकारं उच्च मुल्याडंकन याइगु धयादिल ।
ज्याझ्वलय् उपप्रधानमन्त्री व परराष्ट्रमन्त्री सुजाता कोइरालां गैरआवासीय नेपालीतय्त दोहरो नागरिकता बीत सरकारं विशेष पहल यानाच्वंगु धयादिल । वयेकलं गैरअवासीय नेपालीतय् हक अधिकार सुरक्षाया निंतिं सरकारं न्हूगु संविधानय् विशेष व्यवस्था याइगु धयादिल ।
'नेपाःमिया निंतिं नेपाःमि' हे धइगु नारा बिया न्ह्याःगु प्यक्वः विश्व सम्मेलनय् एनआरएनया अध्यक्ष उपेन्द्र महात्तों नेपाःया विकासया निंतिं गैर आवसीय नेपालीतय्सं लगानी याये चाहे जूगु धयादिसें थुकीयात ग्वाहालि यायेत सरकार नाप इनाप यानादिल ।
सन् २००३ य् न्हापाःगु खुशी जूगु सम्मेलन लिपाः प्रत्येक निदँय् छक गैरआवसीय नेपालीतय् विश्व सम्मेलन जुयाच्वंगु दु । थुगुसीया विश्व सम्मेलनय् न्यय्नीगू देया न्यासः स्वयां अप्व एनआरएनतय्सं ब्वति कयाच्वंगु दु ।
