माओवादीं बजेट पास यायेत ग्वाहालि याइ : प्रम
प्रधानमन्त्री माधवकुमार नेपालं राजनीतिक निकासया निंतिं एकीकृत नेकपा (माओवादी)यात जिम्मेवार दयेकेत थः लगेजुयाच्वंगु धयादिसें बजेट पारित यायेत माओवादीं ग्वाहालि याइगु विश्वास प्वंकादिल ।
मंगलवाः मध्य व सुदूरपश्चिमया बाढी प्रभावित क्षेत्रया भ्रमणय् झायादीत सुर्खेत थ्यंकादिम्ह प्रधानमन्त्री नेपालं बजेट पारित याइगु ज्याय् माओवादीं अवरोध मखु ग्वाहालि याइ धयादिल । वयेकलं बजेट पारित मजुया सरकारं राष्ट्रया ढुकुटीं ध्याबा खर्च याये मदइगु न्हि मवइगु बिचाः नं प्वंकादिल ।
सुर्खेत विमानस्थलय् संचारकर्मीत नाप खँल्हाबंला यानादिसें वयेकलं कांग्रेस नेतृ सुजाता कोइरालायात उपप्रधानमन्त्री नियुक्त यानाः वःगु विरोधं सरकारया स्थायित्वलय् छुं नं असर मलाकीगु धयादिल ।
वंगु वाःलय् तःन्हु मदिक्क वा वयाः मध्य व सुदूरपश्चिमय् व:गु बाढी प्रभावित क्षेत्रया निरिक्षण यायेत प्रधानमन्त्रीया नेतृत्वय् अर्थमन्त्री सुरेन्द्र पाण्डे, कांग्रेस कार्यवहाक सभापति सुशील कोइराला, गृह सहसचिव शंकरप्रसाद कोइराला सहितया पुचः उखे पाखे वंगु खः ।
सैनिक हेलिकप्टरय् च्वनाः वंगु प्रधानमन्त्री सहितया पुचलं अछाम, बझाङ, डडेलधुर, कैलाली, बर्दीया व बाँकेया भ्रमण याइगु ज्याझ्वः दु ।
