प्रहरीया चाल खनाः प्रम चकित
येँ (सन्ध्या टाइम्स)/ प्रहरी महानिरीक्षक रमेश चन्दं थः स्वयां निगू तह क्वय्याम्ह एआईजी मदन खड्कायात कार्यभार बियाः सिंगापुर वंगु घटनां प्रहरी जक मखु स्वयम् प्रधानमन्त्री माधव नेपालयात समेत चकित याना बिउगु दु।
सूत्रं बिउगु जानकारी कथं प्रहरी दुने थ्व छु जूगु धकाः न्यनेकने यायेत प्रम नेपाल थम्हं हे थीथी मनूतय्त स्वापू तयादीगु दु। वय्कलं थ्व मन्त्रिपरिषद्या निर्णय मखुगु जूगुलिं थम्हं बांलाक मसिउगु स्पष्टीकरण नं बियाच्वंगु खँ धाःगु दु।
गृह मन्त्री भिम रावललिसें महानिरीक्षक चन्द इन्टरपोलया बैठकय् ब्वति कायेत न्हय्न्हुया लागिं सिंगापुर वंगु खः। थः पिहां वनेबलय् वय्कलं प्रमुखया कार्यभार थः स्वयां क्वसं च्वंम्ह वरिष्ठ एआईजी रविन्द्रप्रताप शाहयात कार्यभार बिया थकेमाःगु खः। तर शाहयात कार्यभार मबिसे वय्कः स्वयां नं क्वय्याम्ह एआईजी मदन खड्कायात कार्यभार बिया थकूगु खः। खड्का न्हापा धरानया जिल्ला प्रमुख जूगु इलय् मिखां मखंम्ह मनूयात मोटरसाइकलया लाइसेन्स बिउगु प्रकरणय् लाःम्ह खः ।
वामदेव गौतम गृह मन्त्री जुयाच्वंगु इलय् प्रहरी दुने १ नम्बरया शाहयात त्वःताः क्वय्याम्ह चन्दयात महानिरीक्षक दयेकूगु खः ।
