'संवैधानिक सर्वोच्चता' य् सहमत
येँ (सन्ध्या टाइम्स)/संविधानयात देय्या मूल कानून माने यायेगु व संवैधानिक सर्वोच्चता कायम यायेत राजनीतिक दलत सहमत जूगु दु ।
संवैधानिक समितिया थौं सुथय् च्वंगु बैठकय् 'संसदीय सर्वोच्चता' लाकि 'संवैधानिक सर्वोच्चता' धइगु विषयय् जूगु सहलह लिपा दलत संवैधानिक सर्वोच्चताय् सहमत जूगु खः। उपसमितिं लःल्हाःगु प्रारम्भिक मस्यौदाय् दफावार सहलहय् ब्वति काःगु दलतय्सं संविधानयात देय्या मूल कानून माने यायेगु खः। अथे हे देय्या सार्वभौमसत्ता नेपाली जनतायाके दइगु, राजकीय सत्ता छ्यलेगु संविधानय् च्वयातःकथं जनतां यायेगु धइगु बारे नं सहमत जूगु दु। संविधानय् दुथ्याकेगु थ्व विषयस उपसमितिइ हे सहमति कायम जूगु खः ।
तर संविधानया नां, राज्य, राष्ट्रया परिभाषा, राज्यया क्षेत्र विषयय् धाःसा दलतय् दथुइ विवाद कायम हे दनि ।
