सिंहदरवारय् पत्रकारतय् धर्ना
येँ (सन्ध्या टाइम्स)/नेपाल पत्रकार महासंघ अन्तर्गत स्वनिगःया स्वंगुलिं जिल्ला शाखाया पदाधिकारीतय्सं थौं निषेधित क्षेत्र त्वाःथलाः सिंहदरवारया मूध्वाखा न्ह्यःने धर्ना बिसें प्रदर्शन यात ।
श्रमजीवी पत्रकार ऐन कार्यान्वयन यायेमाःगु, राजधानी लगायतया सञ्चारगृहपाखें बिना कारण निष्कासन याःपिं पत्रकारय् पुनर्बहाली जुइमाःगु व पत्रकारतय्त सुराकी समितिइ तयेगु सरकारी निर्णय लित कायेमाःगु माग यासें पत्रकारतय्सं प्रदर्शन याःगु खः ।
विरोध ज्याझ्वलय् न्ववायेगु झ्वलय् नेपाल पत्रकार महासंघया केन्द्रीय कोषाध्यक्ष रमेश बिष्टं पत्रकारयात सुराकी दयेकल धाःसा देशव्यापी आन्दोलन यायेगु ख्याच्वः नं बिउगु दु ।
वंगु छुं न्हि न्ह्यः जक सरकारं देय्न्यंकं सुरक्षा स्थिति बल्लाकेत व तराई लागाय् सशस्त्र भूमिगत आन्दोलन यानाच्वंपिनिगु गतिविधि नियन्त्रण यायेत थीथी जिल्लाय् विशेष समिति दयेकेगु व उकी पत्रकारतय्त नं सुराकी कथं दुथ्याकेगु व्यवस्था यानातःगु खः ।
उगु व्यवस्थाया विरुद्ध पत्रकार महासंघं विरोध प्वंकुसें अज्याःगु समितिइ च्वनीपिं पत्रकारतय्त महासंघं कार्वाही यायेगु ख्याच्वः बिउगु खः ।
