न्हूधाःया नापनापं सामाजिक ज्याय् गुथि
येँ (सन्ध्या टाइम्स)/वंगु इलय् त्वनेगु लः व सरसफाई क्षेत्रय् जनचेतना अभिवृद्धि यायेगु ज्याय् संलग्न जुया वयाच्वंगु गुथि आः सामाजिक क्रियाकलापय् नं अग्रसर जुइगु जूगु दु।
गुथिया नव निर्वाचित जुयादीम्ह अध्यक्ष महेश्वर श्रेष्ठं सामाजिक विकास व मेगु क्षेत्रय् नं स्थानीय जनताया सहभागिताय् जनचेतना अभिवृद्धि व सेवा विस्तार यायेगु खँ धयादीगु दु ।
गुथिया वार्षिक साधारणसभाय् न्ववायेगु झ्वलय् जनताया शिक्षा, स्वास्थ्य, त्वनेगु लः व सरसफाइया अवस्थायात सुधारया निंतिं आः वइगु दिनय् क्रियाशील जुइगु खँ नं वय्कलं कनादीगु दु ।
उगु साधारणसभां कार्यसमितिया मेपिं दुजलय् रविन साय्मि उपाध्यक्ष, लक्ष्मी राजभण्डारी सचिव, दिपक वज्राचार्य कोषाध्यक्ष व दुजलय् पुष्कर माथेमा, डा. नबीस प्रधान, अरुण जोशी, देवेन्द्र श्रेष्ठ व भावना मानन्धरपिं निर्वाचित जुयादीगु दु ।
उगु ज्याझ्वलय् लुमन्तिया अध्यक्ष लजना मानन्धर, वाटर एड नेपालया अनुसन्धान अधिकृत रवीनलाल श्रेष्ठ, गुथिया निवर्तमान अध्यक्ष संजिव मानन्धर व निर्देशक अनिल स्थापितपिंसं थःथःगु नुगःखँ प्वंकादीगु खः ।
साधारणसभाय् अनन्त वज्राचार्य कोचिङ्ग कक्षा सञ्चालनया बारे व सगुन वज्राचार्यं गुथिं पिथना वयाच्वंगु पत्रिकाया बारे जानकारी याकूगु खः ।
